“Askush nuk fiton nga lufta tregtare” – FMN thekson impaktin e kundërpërgjigjes nga vendet e tjera ndaj SHBA

Kreu i Fondit Monetar Ndërkombëtar, Christine Lagarde, tha se askush nuk del fitimtar nga një luftë tregtare, duke paralajmëruar se ndikimi ekonomik i tarifave të SHBA do të ishte i konsiderueshëm nëse vende të tjera kundërpërgjigjen me barrierat e tyre.

Këtë javë, presidenti Donald Trump përsëriti planet e tij për të vendosur tarifa mbi importet e çelikut dhe aluminit, duke paralajmëruar Bashkimin Europian se do të përballet me taksa të mëdha nëse nuk trajton mirë Shtetet e Bashkuara në lidhje me tregtinë.

“Ndikimi makro-ekonomik do të jetë i konsiderueshëm, jo vetëm nëse Shtetet e Bashkuara e bëjnë veprimin, por nëse vendet e tjera ndjekin kundërmasa,  kryesisht ato që do të ndikohen më shumë si Kanadaja, Europa dhe Gjermania në veçanti”, tha Lagarde.

Komentet e Trump kanë sjellë kritika për mos respektimin e rregullave dhe paralajmërime nga vetë ligjbërësit dhe bizneset amerikane për një reagim të ngjashëm, gjë që do të përshkallëzohej në luftë tregtare dhe që do të dëmtojë vetë ekonominë e Shteteve të Bashkuara.

Trump ka thënë se Amerika mund ta fitojë në një luftë të tillë,  ndërkohë që aktualisht ka një deficit të madh tregtar. Megjithatë, Lagarde tha se në një luftë tregtare, të shkaktuar nga rritje reciproke të tarifave, askush nuk fiton dhe ka humbës nga të dyja palët.

Lagarde i dha pak të drejtë presidentit, duke thënë se ka shumë vende që nuk respektojnë dakordësitë e Organizatës Botërore të Tregtisë si në rastin e Kinës.  Lagarde e quajti tregtinë ndërkombëtare si motorin e rritjes, inovacionit dhe konkurrueshmërisë dhe paralajmëroi se kërcënimi i tregtisë do të cenojë ekonominë botërore.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.