Asnjë përmirësim në sigurinë rrugore – Në 8 muaj, 2 aksidente më shumë se në 2016

Numri i aksidenteve rrugore të ndodhura gjatë tetë muajve të parë të vitit është pothuajse i njëjtë me atë të periudhës Janar-Gusht 2016, çka nënkupton se asgjë nuk ka ndryshuar për të përmirësuar kushtet e sigurisë.

Janë 1313 raste për vitin 2017, 2 më shumë se një vit më parë, të cilat kanë patur si pasojë 149 të vdekur dhe 1620 të plagosur. Por një tregues pozitiv është ulja e vdekshmërisë nga aksidentet, me 18,2%.

Statistikat do të ishin disi më pozitive nëse nuk do të merreshin në konsideratë të dhënat për muajin Gusht, kur  aksidentet u shtuan me 8,6%, duke shkaktuar edhe 6 të vdekur më shumë se një vit më parë.

Sjellja e drejtuesve të mjeteve vijon të mbetet arsyeja kryesore e aksidenteve, përgjegjëse për 80% të tyre. Por, teksa ky tregues tregon një përmirësim të lehtë gjatë tetë muajve të parë të këtij viti, aksidentet e shkaktuara nga sjellja e gabuar e këmbësorëve vijojnë të shtohen.

Aksidentet më të shumta të shkaktuara në Gusht kanë ardhur nga drejtues të moshave 25-35 vjeç, por vihet re një përmirësim i kujdesit në timon për të gjitha grupmoshat deri në 35 vjeç. Nga ana tjetër, në Gusht, pjesa e shoferëve në moshë më të madhe është treguar më neglizhent, duke rritur ndjeshëm numrin e aksidenteve.

Në rang qarqesh, Tirana kryeson listën për numrin më të madh të aksidenteve të ndodhura, me një rritje të lehtë prej 8%.

Ndërkohë, qarku që ka patur përmirësimin më të madh për këtë vit është Shkodra, me 55% më pak aksidente. Fieri vijon të mbetet qarku më problematik sa i përket shkallës së rëndë të aksidenteve, të cilat pavarësisht numrit të ulët (vetëm 79), kanë shkaktuar 20 viktima.

Vetëm pak ditë më parë, ministri i Infrasktrukturës dhe Energjisë, Damian Gjiknuri, ka dhënë një ultimatum për pastrimin e objekteve dhe tabelave që bëhen burim aksidentesh në të gjithë akset kombëtare.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.