Aston Martin, dita e parë në Bursë – Arrin një vlerë tregu prej 4.3 mld paund, në garë me Ferrari
Aksionet e Aston Martin ranë në ditën e parë tregtare në Londër, ndërkohë që oferta publike fillestare arriti një vlerësim që e vendos kompaninë përballë konkurrentit italian Ferrari. Aksioni u vendos në 19 paund, apo 24.7 dollarë ditën e Mërkurë, duke i dhënë Aston Martin një kapitalizim prej 4.3 miliardë paund.
Pas arritjes së këtij niveli fillimisht, vlera në treg e kompanisë ra me 6.6%. Ndërkohë që vlera në treg e Aston Martin është thuajse 15% më pak se objektivi maksimal, kjo është ende 20.7 herë sipër fitimit për gjysmën e parë të vitit.
Ferrari tregtohet aktualisht 21-fish sipër të ardhurave të pritshme për vitin 2018. Marka britanike, që është më pak përfituese dhe ka një bilanc financiar më të dobët se homologu italian, po përpiqet të zgjerojë prezencën në botën e makinave sportive, me modelet Vanquish, Vantage dhe DB. Ndërkohë, firma po përpiqet të ringrejë emrin Lagonda, që të hyjë në një pjesë tregu që ndahet nga rivalët britanikë si Rolls- Royce dhe Bentley.
“Jemi të surprizuar nga përgjigja pozitive e investitorëve”, tha kreu ekzekutiv Andy Palmer, duke e përshkruar ofertën publike fillestare si një arritje për kompaninë. Aston Marton, që ka fituar famë nga seritë James Bond, uli ambiciet këtë javë duke ngushtuar segmentin objektiv për listimin me 11%.
Kjo se çoi aksionin në një varg prej 18.5- 20 paund. Listimi shënon ofertën e parë publike fillestare të një prodhuesi britanik në më shumë se 3 dekada, që kur Jaguar Land Rover u kthye në një kompani të pavarur në qeverinë e Margaret Thatcher në vitin 1984.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.