AstraZeneca publikon rezultatin e shitjeve – Vaksina jep kontribut të vogël. Përfitueshmëri “modeste” te porositë e reja

Vaksina e AstraZeneca ka dhënë një kontribut të vogël në të ardhurat në tremujorin e tretë dhe kompania pret që vaksina të arrijë në “përfitueshmëri modeste” me porositë e reja, pasi publikoi 1.05 miliardë dollarë shitje nga vaksina për periudhën.  Kompania anglo-suedeze, që ka thënë se nuk do synojë fitim nga vaksina e lirë dhe e lehtë për t’u përdorur gjatë pandemisë, prezantoi planet këtë javë për të caktuar një njësi paralele për vaksinat dhe trajtimet me antitrupa, që të përqëndrohen në luftën me koronavirusin.

Të ardhurat totale të kompanisë u rritën me 47% në 9.74 miliardë dollarë në tremujorin e tretë, ndërsa të ardhurat bazë arritën në 1.08 dollarë për aksion, sipas kompanisë, që tha se vaksina ka kontribuar një cent tek fitimi bazë.  Blerja prej 39 miliardë dollarë e firmës së sëmundjeve të rralla Alexion nga data 21 Korrik, ka nxitur gjithashtu shitjet. Disa nga trajtimet bazë të kompanisë për kancerin, sëmundjet e rralla dhe të zemrës, rezultuan zhgënjyese, me shitje më të ulëta se ç’pritej të ilaçit të kancerit të mushkërive, Tagrisso, për shkak të uljes së çmimeve në Kinë.

Megjithatë, ilaçi i astmës, Symbicort,regjistroi një performancë të fortë në tregjet në zhvillim, me shitjet që u rritën me 13% në 676 milionë dollarë gjatë tremujorit. Të ardhurat e produktit më të shitur, Tagrisso, u rritën me 8% në 1.25 miliardë dollarë.  AstraZeneca deklaroi se fitimi i limituar nga vaksina në tremujorin e katërt do të kompensojë kostot e lidhura me koktejin me antitrupa të Covid-19.  Rivali Pfizer projektoi këtë muaj shitje në 2021 dhe 2022 nga vaksina në të paktën 65 miliardë dollarë, duke kaluar pritshmëritë. Megjithatë, Moderna shkurtoi perspektivën për këtë vit në rreth 5 miliardë dollarë, prej problemeve me prodhimin.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.