Athina “përpihet” nga flakët – Të paktën 60 persona humbën jetën duke u larguar drejt detit

Të paktën 60 persona kanë humbur jetën nga zjarret masive në periferi të Athinës dhe mbi 150 janë plagosur, në përpjekje për t’u arratisur drejt plazheve. Ekipet e emergjencës zbuluan një grup prej 26 viktimash, midis tyre edhe fëmijë, duke qëndruar së bashku në një zonë vetëm 30 metra larg detit, në Mati të Atikës.

Zjarri ishte më i keqi për Greqinë që kur flakët pushtuan gadishullin e Peloponezit në Gusht të vitit 2007. Zjarri nisi në Mati gjatë pasdites të së Hënës dhe ka vazhduar në disa zona deri në mëngjesin e së Martës.

Rojet bregdetare kanë kërkuar plazhet për të mbijetuar, ndërkohë që spitalet ushtarake kanë qenë në gjendje emergjence, sipas një zëdhënësi të qeverisë. Sipas zjarrfikësve, banorët dhe turistët në zonë nuk janë larguar dot në kohë, pavarësisht se ishin pak metra larg nga deti.

Mati ndodhet në pjesën lindore të Rafinjës, një vend popullor për pushuesit grekë, veçanërisht pensionistët dhe fëmijët, 29 kilometra larg kryeqytetit. 26 personat e vdekur u zbuluan pasi zëdhënësi i qeverisë, Dimitris Tzanakopoulos, raportoi 20 të tjerë më herët gjatë ditës.

Rojet bregdetare raportuan se 4 trupa të tjerë janë nxjerrë nga deti. Në total, në bregdet, janë shpëtuar mbi 696 njerëz që u arratisën drejt plazhit. Brigada e zjarrit në Greqi bëri të ditur se përhapja dhe intensiteti i zjarrit në Mati është ngadalësuar të Martën, ndërkohë që era është qetësuar, por që nuk është ende në kontroll të plotë.

“Ishte një natë e vështirë për Greqinë”, tha Kryeminsitri, Alexis Tsipras, i cili njëkohësisht shpalli edhe gjendjen e jashtëzakonshme.

Gjithashtu, kryeministri Tsipras ka shpallur tre ditë zie kombëtare, duke thënë se tani nuk është koha për llogaridhënie, por për të punuar në ndihmë të të prekurve nga tragjedia. “asgjë dhe askush nuk do të harrohet. Asgjë dhe askush nuk do të largohet pa ndihmën e shtetit. Të gjithë do të marrin një përgjigje,” tha Tsipras.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.