Auditi në bankë – CEO-t e duan krijues, BSH e do të pavarur
Shoqata Shqiptare e Bankave organizoi të premten një forum mbi auditimin e brendshëm në sektorin bankar, të fokusuar te përgjegjshmëria ndaj grupeve të interesit. Forumi solli këndvështrime të ndryshme rreth misionit dhe sfidave të strukturave të kontrollit në banka.
Drejtori i përgjithshëm i Bankës Kombëtare Tregtare, Seyhan Pencapligil, tha se puna e auditit nuk duhet të jetë një burokraci e mërzitshme. Sipas tij, menaxherët e bankave presin që auditët të sjellin ide të reja, për të përmirësuar praktikat dhe rregullat e brendshme të punës.
“Ne presim nga auditët më shumë ide të reja. Ata nuk duhet të jetë vetëm kontrollues, por duhet të jenë këshilltarë proaktivë për mënyrën sesi mund të përmirësohet puna në bankë. Për mendimin tim, parandalimi është më i rëndësishëm se zbulimi. Ndaj, auditët duhet ta shohin rolin e tyre më shumë në drejtimi të kontributit për të përmirësuar procedurat dhe rregulloret e brendshme, në mënyrë që shkeljet të parandalohen.”
Banka e Shqipërisë ka një shqetësim tjetër për rolin e auditit. Drejtori i Departamentit të Mbikëqyrjes, Deniz Deralla, tha se për Bankën e Shqipërisë gjëja më e rëndësishme është që auditi të jetë sa më i pavarur nga menaxhimi i bankës.
“Ajo që i intereson së pari Bankës së Shqipërisë është më shumë pavarësi e auditëve në banka. Ne po përpiqemi të sjellim praktikat më të mira në kuadrin rregullator, për të forcuar rolin e auditit dhe pavarësinë e menaxhimit të rrezikut. Në rregulloren e re, ne parashikojmë që drejtuesi i kontrollit të brendshëm në bankë duhet të jetë detyrimisht edhe anëtar i Bordit Drejtues, për të rritur rëndësinë e kësaj strukture në drejtimin e bankës.”
Me rritjen e përdorimit të teknologjive të reja, paralelisht po rritet edhe rreziku nga mashtrimet dhe krimi kibernetik. Gjatë diskutimeve në forum, pikërisht ky rrezik është sfida e re e madhe për strukturat e kontrollit në banka.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.