Australia ndryshon planin e vaksinimit. Do të dyfishojë porositë e Pfizer pas limitit të AstraZeneca në 50-vjeç e sipër

Australia ka dyfishuar porositë e vaksinës së Pfizer me BioNTech, sipas kryeministrit Scott Morrison, ndërkohë që vendi po riorganizon planin e imunizimit, për shkak të shqetësimeve mbi rrezikun e mpiksjes së gjakut nga vaksina e AstraZeneca.  Australia e kishte bazuar programin e vaksinimit kryesisht tek vaksina e AstraZeneca, me një porosi prej 50 milionë dozash, mjaftueshëm për të vaksinuar të gjithë popullsinë prej 25 milionë.  Megjithatë, Australia i është bashkuar tashmë një serë vendesh që kufizojnë përdorimin e vaksinës për shkak të shqetësimeve mbi mpiksjen e gjakut. Autoritetet lokale të shëndetësisë kanë ndryshuar rekomandimin, duke thënë se thuajse 12 milionë njerëz në moshë nën 50 vjeç, duhet të marrin produktin e Pfizer.

Për rrjedhojë, Australia ka dyfishuar porosinë e mëparshme tek Pfizer në 50 milionë doza, mjaftueshëm për 4/5 e popullsisë, doza që do merren deri në fund të vitit, sipas Morrison.  Ndryshimi i politikave drejt Pfizer i jep fund planit për të vaksinuar të gjithë popullsinë deri në Tetor. “Nuk është një ndalim i vaksinës së AstraZeneca. Ata që janë mbi 50-vjeç janë të inkurajuar që ta marrin”- shtoi Morrison.   Përpara se të lajmërohej porosia e Pfizer, AstraZeneca deklaroi se e respekton vendimin e Australisë dhe shtoi se po bashkëpunon me rregullatorët në të gjithë botën për të kuptuar këto raste jashtëzakonisht të rralla.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.