Automjetet, procedura e re për të kryer pagesën on-line të taksave. Si veprohet nëse mjeti juaj nuk “figuron” i regjistruar
Të gjithë qytetarët që zotërojnë një automjet mund të informohen dhe mund të kryejnë pagesën e taksave on- line në faqen “E- Albania”. Ky shërbim elektronik mundëson publikimin online të taksave të automjeteve në zotërim të qytetarëve dhe bizneseve (Ligji nr. 9975, datë 28.07.2008 “Për Taksat Kombëtare”, i ndryshuar), duke u mundësuar gjithashtu t’i paguajnë ato on-line.
Portali jep të informacion mbi veprimet që duhen kryer në rastet kur nuk shfaqen të dhënat për mjetin tuaj.
“Në rastin kur shërbimi shfaq: “Nuk ka të dhëna!”, arsyet e mosshfaqjes së të dhënave janë: Nuk ka automjete të regjistruara në pronësi të qytetarit. Ekzistojnë raste kur ka automjete të regjistruara në pronësi të qytetarit, por në të dhënat e pronarit nuk është i regjistruar NID-i i tij. Në këto raste lutemi që qytetari të drejtohet pranë Drejtorive Rajonale të Shërbimeve të Transportit Rrugor për të regjistruar me NID (numrin e identifikimit) ose me emër/atësi/mbiemër automjetin/et e tij”, thuhet në portalin E-Albania.
Dokumentacioni i nevojshëm
Për të marrë shërbimin personi duhet të ketë në dispozicion këto dokumente:
-Dokument i identifikimit të kërkuesit; kartë identiteti ose pasaportë biometrike (i nevojshëm për t’u loguar në portalin e-Albania).
Hapat e procedurës
Për të përdorur shërbimin duhet të:
-Regjistroheni si qytetar ose si biznes në portal;
-Zgjidhni shërbimin “Taksat e automjeteve”
-Klikoni butonin” Përdor” për të parë automjetet që dispononi.
-Zgjidhni mjetin për të cilin dëshironi të shikoni taksat përkatëse dhe klikoni butonin “Zgjidh”.
-Klikoni butonin ” Llogarit” në rast se keni taksa të papaguara për të parë vlerën e tyre.
-Nëse dëshironi të kryeni pagesën e taksave të papaguara, shtypni butonin “Paguaj” dhe ndiqni hapat për të kryer pagesën.
Sipas portalit E-Albania, shërbimi mund të merret menjëherë ndërkohë që periudha e vlefshmërisë është një vit. Po kështu portali publikon edhe adresat e Drejtorive Rajonale të Shërbimeve të Transportit Rrugor për çdo informacion që mund t’iu duhet, duke klikuar këtu
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.