Avancon loti i dytë i unazës lindore – Balluku: 148 milion lekë për shpronësimet, punimet mbyllen përpara qershorit 2021
Loti 2 i Unazës lindore të Tiranës parashikohet të përfundojë përpara afatit zyrtar që është qershori i vitit 2021. Ky segment përfshin pjesën nga fusha e helikopterëve te rreth rrotullimi i Shkozës, ndërkohë që përfundimi i tij do të mundësojë edhe hapjen e lotit I, duke ndikuar në uljen e trafikut në kryeqytet. Gjatë një inspektimi mbi ecurinë e punimeve, ministrja e Infrastrukturës dhe Energjisë, Belinda Balluku tha se aktualisht është kryer më shumë se gjysma e punimeve fizike të veprës,.
Balluku theksoi se është zgjidhur problemi i shpronësimeve për banorët e zonës, ndërsa në mbledhjen e ardhshme të qeverisë do të miratohet fondi prej 148 mln lekësh, që tashmë është i akorduar.
Loti II i Unazës lindore ka një gjatësi prej 2.38 km, ndërkohë që për ndërtimin e tij ka patur një sërë vonesash. Përveç problemit të shpronësimeve, shkak për vonesat u bë edhe kërkesa e Bashkisë së Tiranës për ndryshimin e projektit, çka solli plotësimin e tij me elementët të ndriçimit apo trotuareve në funksion të banorëve të zonës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.