Avokati i Popullit: Hartat kadastrale mangësi të rënda – Raporti 2021: Nuk përputhen me terrenin, nuk kuptohet dot cila është e sakta
Në analizën që i bën çështjeve të pronave në vend, Institucioni i Avokatit të Popullit evidenton hartat kadastrale si një prej problemeve më të mprehta. Ato shumë shpesh nuk përputhen me situatën e pasurive të paluajtshme në terren, ndërkohë që bëhet fjalë për zonat më të rëndësishme të territorit, si Tirana e Bregdeti. Ndër çështjet e mbartura në vite është se hartat ekzistuese kadastrale kanë një tendencë të lartë të mos jenë në përputhje me situatën në terren, thekson Avokati i Popullit në raportin zyrtar për aktivitetin në vitin 2021. Problematika që haset më shpesh është se njësitë e pasurive të paluajtshme (parcelat dhe ndërtesat) në shumë raste janë të pozicionuara gabimisht. Me kalimin e kohës për shkak të ndryshimeve në specifikime dhe referencë, problematika është rritur. Në shumë raste, kur ka kopje të ndryshme fletë harte, vihet në diskutim se cila hartë është aktuale apo e sakta.
Në zyrat e ASHK-së të dhënat mbi parcelat nuk mungojnë, por nuk dihet me saktësi statusi i pronës, thekson më tej në raport Avokati i Popullit. Kjo situatë është përgjithësisht më e komplikuar në zonat urbane, sidomos në Tiranë dhe rreth saj, si dhe në zonat bregdetare më të mëdha, ku ka shumë ndërtime informale. Gabimet më së shumti janë akumuluar për shkak të mospërputhjeve që vijnë edhe nga mungesa e dokumentacionit. Gabimet në regjistrimet e pronave përgjithësisht reflektohen në kufi të gabuar, madhësinë e parcelës dhe dokumentacionin e pronësisë. “Gabimet zakonisht zbulohen në kohën kur bëhet një transaksion në njësinë përkatëse të pasurive të paluajtshme pasi pronari i pronës apo pronarët kufitarë nuk kanë dijeni për gabimet në të dhënat kadastrale mbi pasuritë”, thekson raporti.
Por nuk janë hartat problemi i vetëm me të cilat përballet çështja e pronës në vend.
Çështja e regjistrimit në regjistrin e pasurive të paluajtshme të Agjencisë Shtetërore të Kadastrës të 26 mijë vendimeve të dhëna në vite prej Agjencisë së Trajtimit të Pronës të njohjes së pronës me të drejtë kompensimi mbetet edhe sot e pazgjidhur, thekson Avokati i Popullit, duke këshilluar që pronarët të kompensohen me tokë shtetërore dhe jo me para në dorë, gjë që do të cenonte rëndë buxhetin e shtetit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.