Azia fuqizon masat e karantinës – Shumë shtete nga Australia e deri në Vietnam, në “luftë” me variantin Delta

Shumë vende nga Australia në Vietnam lajmëruan masa drastike dhe karantina më të gjata për banorët, ndërkohë që autoritetet po hasin vështirësi me përhapjen e variantit delta të koronavirusit. Në qytetin më të madh të Australisë, Sidney, mbi 2 milionë banorë apo 40% e popullsisë, përballen me shtetrrethim nga ora 9 e mbrëmjes në 5 të mëngjesit, së bashku me limite të tjera.  Karantina e të gjithë qytetit, që ndodhet tashmë në javën e tetë, është zgjatur gjithashtu deri në fund të Shtatorit, me banorët që u kërkohet të veshin maska në publik.

Liderja e New South Wales, ku ndodhet Sidney, Gladys Berejiklian, tha se ka biseduar me policinë dhe organet shëndetësore që të bashkëpunojnë,  dhe për të formuar një listë përfundimtare të masat që duhen marrë.  Shteti,  që ka popullsinë më të madhe të Australisë, raportoi 644 infeksione të reja në 24 orët e fundit, ndërsa shteti juglindor i Viktorias, ku ndodhet Melburni, regjistroi 55 raste, ndërkohë që autoritetet paralajmëruan se infeksioni pritet të dalë nga kontrolli.

Në Zelandën e Re fqinje, një vatër që nisi këtë javë është zgjeruar drejt kryeqytetit Wellington, nga qyteti më i madh Auckland, çfarë bëri që kryeministrja Jacinda Ardern të zgjerojë masat e karantinës.   Vietnami ka vendosur urdhrin më të ashpër deri më tani, duke ndaluar banorët e qendrës së biznesit Ho Chi Minh për të dalë nga shtëpia duke nisur nga dita e Hënë.  Ashtu si Australia dhe Zelanda e Re, Vietnami lavdërohej dikur për suksesin e përmbajtjes së virusit.

Tashmë vendi ka mbi 312,000 infeksione dhe 7,150 vdekje, nga muaji maj ku kishte vetëm 3,000 infeksione dhe 35 vdekje.   Japonia planifikon të trefishojë testet ditore të Covid në 320,000 dhe pranoi se strategjia kryesore e thyerjes së vatrave të infeksionit nuk po funksionon më në qytete të mëdha si Tokio.  Korea e Jugut zgjeroi gjithashtu me 2 javë masat e distancimit social dhe ndalesën e mbledhjes me mbi 2 persona pas orës 6 të pasdites.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.