Azia jetike për globin – Raporti i fundit i FMN sqaron peshën reale të ekonomisë së rajonit
Ekonomia aziatike do të vazhdojë të mbajë trendin pozitiv të rritjes, e udhëhequr padiskutim nga Kina, për të paktën pesë ose gjashtë vite, si dhe shërben si një motor i rëndësishëm i ekonomisë globale, deklaroi Fondi Monetar Ndërkombëtar.
Në raportin e fundit rajonal për Azinë, FMN rriti projeksionet për ekonominë e kontinentit, për këtë vit dhe atë të ardhshëm, kryesisht falë rritjes së fuqisë së konsumit dhe perspektivës së investimeve.
Sipas projeksioneve, rritja ekonomike në zonën e Azi-paqësorit do të rritet në 5.6% gjatë këtij viti dhe do të zbresë në 5.5% vitin e ardhshëm, 0.1% mbi projeksionet e mëparshme të muajit Prill.
Në gjysmën e parë të vitit 2017, rajoni mbajti një nivel të lartë fluksi të kapitalit me tregjet financiare që vazhdojnë të jenë në vrull, thotë FMN.
Sipas institucionit, Azia kontribuon në masën 63% në rritjen ekonomike globale, dhe 34% i zë vetëm Kina, 13% India.
Pra, të dyja së bashku përbëjnë thuajse gjysmën e rritjes ekonomike globale, çka tregon qartë rëndësinë e rajonit për ekonominë botërore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.