AztraZeneca ndalon provat e vaksinës. Një pjesëmarrës sëmuret në mënyrë të pashpjeguar pas injeksionit
AstraZeneca deklaroi se ka ndaluar provat botërore të vaksinës së koronavirusit, përfshirë ato në fazën përfundimtare, për shkak të një sëmundjeje të pashpjeguar tek një pjesëmarrës në studim. Vaksina, që po zhvillohet me Universitetin e Oksfordit, është përshkruar nga OBSH si kandidati kryesor në botë dhe më i avancuari në aspektin e zhvillimit. Ndalimi i punimeve zbeh perspektivën e nxjerrjes së parakohëshme në treg të vaksinës, pas raportimeve se Shtetet e Bashkuara po synojnë miratim të shpejtë përpara zgjedhjeve presidenciale. Firma britanike bëri të ditur se ka ndaluar provat për të lejuar një komision të pavarur që të rishikojë të dhënat e sigurisë.
“Ky është një veprim rutinë që duhet të ndodhë sa herë ka një sëmundje të pashpjegueshme tek provat”,- deklaroi kompania. Detajet e sëmundjes nuk u shpejguan, por pjesëmarrësi pritet të shërohet sipas raportimeve mediatike. Sipas një raportimi të New York Times, që përmendi burime me njohuri ndaj situatës, pjesëmarrësi në provat britanike u zbulua se kishte mielit të tërthortë, një sindromë inflamatore që prek palcën kurrizore dhe që shkaktohet zakonisht nga infeksionet virale. Megjithatë, raporti bën të ditur se nuk dihet nëse sëmundja lidhet në mënyrë direkte me vaksinën e AstraZeneca. Aksionet e kompanisë ranë me më shumë se 8% në tregtinë amerikane, ndërsa aksionet e rivalit Moderna u rritën me mbi 4%. Vaksina e AstraZeneca, e quajtur AZD1222, ndodhet në fazat përfundimtare në SHBA, Britani, Brazil dhe Afrikë të Jugut.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.