“Babai” i Android vjen me një celular të ri që sfidon Samsung dhe Apple
Shpikësi i sistemit të operimit Android, i cili tashmë përdoret në mbi 2 miliardë aparate celularë, televizorë, makina, etj., ka prezantuar modelin e tij të telefonit që synon të zërë vendin e iPhone dhe Samsung.
Andy Rubin e ka quajtur këtë telefon “Essential”, që përkthehet i domosdoshëm dhe thelbësor. Ndryshet nga aparatet e tjerë prej alumini dhe plastike, trupi i Essential është prej titani dhe qeramike, që e bën më rezistent në rast se bie. Kompania ka kaluar një fazë të gjatë testimi për të prodhuar telefona titani, duke tejkaluar në këtë aspekt të gjithë prodhuesit e tjerë.
Celulari do të kushtojë 699 dollarë dhe do të ketë specifikat më të fundit. Ashtu si tek Samsung Galaxy S8, ekrani shtrihet deri në skaje, madje deri në cepin e sipërm të celularit, duke mbështjellë kameran.
Essential do të dalë në treg fillimisht në SHBA, por ka plot antena radio që përshtaten më të gjithë operatorët e telekomunikacionit. Në brendësi do të jetë gjithashtu një procesor Qualcomm 835, 4GB RAM dhe 128 GB memorie.
Ajo që e bën këtë telefon të duket edhe më i pastër, është fakti se sistemi Android nuk është i modifikuar, nuk do të ketë asnjë aplikacion shtesë të panevojshëm, madje nuk ka vendosur as logon e kompanisë nga pas.
Kamerat në këtë pajisje do të jenë 13 dhe 8 megapixel. Ashtu si shumica e telefonave, kamera pas do të ketë një sistem dual, i cili do të lejojë thithjen e më shumë drite. Celulari do të xhirojë në 4K, nga të dy anët e aparatit.
Vizioni i Rubin, është të krijojë një kompani, që ashtu si Apple dikur, të jetë inovatore. Kjo do të thotë se kompania duhet të nuhasë trendet e teknologjisë dhe t’ia ofrojë konsumatorit duke i popullarizuar përmes aksesorëve.
Këtë gjë kërkon ta bëjë që në këtë model, pasi së bashku me aparatin, përdoruesit do të përfitojnë edhe një kamera të vogël shtesë 360°.
Tani mbetet për t’u parë ecuria e aparatit në treg, nëse do të thyejë apo jo mitin se asnjë celular Android që nuk ka logon e Samsung nuk arrin të penetrojë tek publiku.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.