Ballkani dhe Shqipëria jashtë vrullit të blerjeve të makinave në Europën Juglindore – Mbizotërojnë mjetet e përdorura
Europa Juglindore regjistroi një bum në shitjen e automjeteve të reja gjatë gjysmës së parë të këtij viti, megjithatë duket se Ballkani dhe Shqipëria janë disi të shkëputura nga ky vrull.
Shtetet lindore që bëjnë pjesë në BE, regjistruar rritje domethënëse, si Rumania (33.5%), Hungaria (29%), Bullgaria (22.6%) dhe Kroacia (19.3%). Madje edhe Greqia regjistroi një rritje prej 23.7%.
Ndërkohë, në Ballkan shifrat janë ende të zbehta, duke llogaritur se sipas shifrave të OICA (Organizata Ndërkombëtare e Prodhuesve të Automjeteve) në Shqipëri gjatë vitit 2017 u shitën vetëm 2865 automjete të reja, në Maqedoni vetëm 3371 automjete dhe në Serbi 25583 makina.
Pamundësia për blerjen e automjeteve me kilometrazh 0, i ka shtyrë individët në Ballkan t’u drejtohen në masë automjeteve të përdorura. Por edhe nëse llogarisim këto shitje, blerja e automjeteve në Ballkan mbetet e shkëputur nga pjesa tjetër e Europës Juglindore, me përjashtim të Maqedonisë, e cila regjistroi një rritje të shitjeve me 18.1%.
Për gjysmën e parë të vitit, në Shqipëri llogaritet një rritje me gati 9% në vlerat e automjeteve që janë importuar në vend. Mali i Zi regjistron një rritje me 7.6%, Bosnja dhe Hercegovina me 13.5%, Serbia me 13.4% dhe Kosova me vetëm 2.4%.
Në Shqipëri, mbi 80% e automjeteve të importuara vijnë nga vendet e Bashkimit Europian, kryesisht Gjermania dhe Italia. Një trend të ngjashëm shfaqin edhe vendet e tjera të rajonit. Ballkani dhe Europa Lindore ndërkohë shfaqen pas në importet e makinave elektrike në raport me Europën Perëndimore.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.