Ballkani në Londër – Kryeministrat takim me liderët e BE, edhe BERZH me BEI në tryezë

Johannes Hahn, Komisioneri për Zgjerim dhe Fqinjësinë e mirë mbajti fjalën hapëse të samitit të pestë të Ballkanit Perëndimor në kuadër të procesit të Berlinit, që kësaj here mbahet në Londër. Hahn përsëriti kështu fjalët e tij se, Ballkani Perëndimor në tërësi, dhe të 6 vendet në veçanti kanë bërë progres të ndjeshëm, sidomos që prej vitit 2014, kur edhe nisi procesi i Berlinit. Samiti i Londrës do të mbledhë kështu liderët e 6 vendeve të rajonit së bashku me delegacionet përkatëse, si ministrat e jashtëm dhe ata të brendshëm të secilit vend.

Në orën 13.00 nis dreka e punës së bashku me liderët e vendeve që janë pjesë e procesit të Berlinit, si Italia apo Gjermania, por edhe vende si Greqia, Bullgaria e padiskutim edhe Britania që është mikpritëse e eventit. Theresa May do të përfaqësojë qeverinë britanike. Të pranishme gjatë drekës së punës do të jenë edhe krerët e Bankës Europiane të investimeve, Bankës Europiane për Rindërtim dhe zhvillim, sekretari i përgjithshëm i Këshillit të Bashkëpunimit Rajonal etj.

Fokusi i Samitit të këtij viti është përmirësimi i stabilitetit ekonomik nëpërmjet forcimit të marrëdhënie ndër rajonale dhe klimës së biznesit në këto 6 vende. Një orën 14.20 planifikohet seanca e parë plenare me fokus çështjet e punëve të jashtme dhe në 16.20 seanca e dytë plenare me fokus procesin e Berlinit. Në orën 17.20 ndërkohë mësohet se është planifikuar edhe një takim kokë më kokë mes kryeministrit shqiptar dhe atij grek, Alexis Tsipras. Pas pritjes qeveritare për liderët e rajonit, në orën 18.20 planifikohet edhe konferenca për shtyp përmbyllëse e samitit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.