Banka Botërore: Dëmi fizik në Ukrainë kap shifrën e rreth 60 miliardë dollarë deri më tani!
Dëmtimi fizik në ndërtesat dhe infrastrukturën e Ukrainës nga pushtimi rus ka arritur afërsisht 60 miliardë dollarë dhe do të rritet më tej ndërsa lufta vazhdon, tha të enjten presidenti i Bankës Botërore, David Malpass. Malpass tha në një konferencë të Bankës Botërore mbi nevojat e Ukrainës për ndihmë financiare se vlerësimi i hershëm i kostove “të ngushta” të dëmit nuk përfshin kostot ekonomike në rritje të luftës ndaj Ukrainës.
Presidenti ukrainas Volodymyr Zelenskiy, në një fjalim virtual në konferencë, përshkroi kosto shumë më të mëdha dhe nevoja financimi. Ai u tha pjesëmarrësve në komentet e interpretuara se Ukrainës i duhen 7 miliardë dollarë në muaj për të kompensuar humbjet ekonomike të shkaktuara nga pushtimi rus i vendit të tij. Ai tha se komuniteti global duhet të përjashtojë Rusinë menjëherë nga institucionet financiare ndërkombëtare, duke përfshirë Bankën Botërore dhe Fondin Monetar Ndërkombëtar dhe të tjerët, dhe tha se të gjitha vendet “duhet të përgatiten menjëherë për të prishur të gjitha marrëdhëniet me Rusinë”.
Zelenskiy tha se u bëri thirrje vendeve që kanë vendosur sanksione dhe ngrirje mbi asetet ruse që t’i përdorin ato para për të ndihmuar në rindërtimin e Ukrainës pas luftës dhe për të paguar për humbjet e pësuar nga vendet e tjera. Në një konferencë shtypi, Yellen tha se Rusia duhet të përballojë disa nga kostot e rindërtimit të Ukrainës. Por ajo paralajmëroi se përdorimi i rezervave të sekuestruara të bankës qendrore ruse në Shtetet e Bashkuara për të rindërtuar Ukrainën do të ishte një “hap i rëndësishëm” që do të kishte nevojë për diskutime dhe marrëveshje me partnerët ndërkombëtarë.
Kryeministri ukrainas Denys Shmyhal, i cili mori pjesë personalisht në konferencë, tha se PBB-ja e Ukrainës mund të bjerë nga 30% në 50%, me humbje direkte dhe indirekte që arrijnë në 560 miliardë dollarë deri më tani. Ky total është më shumë se tre herë më i madh se ekonomia e Ukrainës, në 155.5 miliardë dollarë në vitin 2020, sipas të dhënave të Bankës Botërore. RTS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.