Banka Botërore, planveprimi për krizën: 30 miliardë dollarë për krizën globale të ushqimit në 15 muajt e ardhshëm!

Banka Botërore bëri publike veprimet që planifikon të ndërmarrë si pjesë e një reagimi gjithëpërfshirës globale ndaj krizës së vazhdueshme të sigurisë ushqimore, me deri në 30 miliardë dollarë në projekte ekzistuese dhe të reja në sektore si bujqësia, ushqimi, mbrojtja sociale, uji dhe ujitja. Ky financim do të përfshijë përpjekjet për të inkurajuar prodhimin e ushqimit dhe produkteve të fertilizimit, përmirësimin e sistemeve ushqimore, lehtësim më të madh të tregtisë dhe mbështetjen e familjeve dhe prodhuesve të cenueshëm.

“Rritjet e çmimeve të ushqimeve kanë efekte shkatërruese për më të varfërit dhe më të cenueshmit. Për të stabilizuar tregjet është thelbësore që vendet të bëjnë deklarata të qarta sa më shpejt të jetë e mundur për rritjen e ardhshme të prodhimit në kuadër të reagimit ndaj pushtimit rus të Ukrainës. Vendet duhet të bëjnë përpjekje të bashkërenditura për të shtuar furnizimin me energji dhe fertilizues pasi fermerët duhen ndihmuan në shtimin e të mbjellave dhe rendimentet e të korrave.

Njëkohësisht duhet të hiqen politikat të cilat bllokojnë importet, devijojnë ushqimin drejt biokarburanteve apo inkurajojnë rezervat e panevojshme”, deklaroi kreu i institucionit financiar, David Malpass.

Banka Botërore po punon me vendet për përgatitjen e projekteve të reja prej 12 miliardë dollarësh për 15 muajt e ardhshëm për t’iu përgjigjur krizës së sigurisë ushqimore. Këto projekte pritet të mbështesin bujqësinë, mbrojtjen sociale për të zbutur efektet e çmimeve më të larta të ushqimeve dhe projektet e ujit dhe ujitjes, me shumicën e burimeve që do të shkojnë për Afrikën e Lindjen e Mesme, Europën Lindore, Azinë Qendrore dhe Azinë Jugore.

Përveç kësaj, fondi ekzistues i Bankës Botërore përfshin balanca të padisbursuara prej 18.7 miliardë dollarësh në projekte me lidhje të drejtpërdrejta me çështjet e sigurisë ushqimore dhe të ushqyerjes, që mbulojnë bujqësinë dhe burimet natyrore, ushqimin, mbrojtjen sociale dhe sektorë të tjerë. Në total, kjo do të arrijë në mbi 30 miliardë dollarë që do të jenë në dispozicion për zbatim për të trajtuar pasigurinë ushqimore gjatë 15 muajve të ardhshëm. Ky projekt do të mbështetet në gamën e plotë të instrumenteve të financimit të Bankës dhe do të plotësohet me punë analitike.

Banka Botërore fitoi përvojë të gjerë në përgjigje të krizës së çmimeve të ushqimit 2007-2008 përmes Programit të Përkohshëm Global që mori kontribute të donatorëve dhe kanalizoi fonde në 49 vende të prekura përmes 100 projekteve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.