Banka e Anglisë kundër Bitcoin – Carney i bën thirrje rregullatorëve të përfundojnë anarkinë e kritpovalutave
Guvernatori i Bankës së Anglisë bëri thirrje për përpjekje më të madhe rregullatore për të sjellë “anarkinë” e kriptovalutave drejt një fundi. “Ka ardhur koha që të mbajmë ekosistemin e kriptovalutave në të njëjtin standard me pjesën tjetër të sistemit financiar”, tha ai.
Carney, që është gjithashtu kreu i Bordit të Stabilitetit Financiar, i bashkohet politikëbërësve që kërkojnë më shumë mbikëqyrje për teknologjinë, ndërkohë që rritja gjigante e kriptovalutave krijoi më shumë se 438 miliardë dollarë në vlerë në vitin 2017.
Carney tha se luhatja ekstreme e këtyre aktiveve reflekton mungesën e ndonjë vlere të perceptuar apo mbështetje të jashtme. Sipas tij, luhatja mesatare e 10 monedhave kryesore është më shumë se 25 herë më e madhe se ajo e tregjeve amerikanë të kapitalit në 2017-ën.
Gjatë fjalimit të tij, ai theksoi vlerën potenciale të teknologjisë së Bitcoin, por shtoi se valutat dixhitale kanë dështuar të arrijnë trajtat e një paraje tradicionale dhe refuzoi idenë e monedhave të krijuara nga bankat qendrore në të ardhmen e afërt.
“Gjëja më e mirë do të ishte rregullimi i elementëve të ekosistemit të kriptovalutave për të luftuar aktivitetet e jashtëligjshme, promovuar integritetin e tregut dhe mbrojtur sigurinë e sistemit financiar. Të jesh pjesë e sistemit financiar sjell privilegje shumë të mëdha, por edhe përgjegjësi”, tha Carney.
Komisioni i Politikave Financiare i Bankës së Anglisë po studion aktualisht ndikimin e kriptovaltuave në stabilitetin financiar të Britanisë, megjithatë Carney thotë se nuk sheh personalisht ndonjë rrezik material. Ai shtoi se Bordi i Stabilitetit Financiar do të raportojë në samitin e G20-ës në Argjentinë këtë muaj.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.