Banka e Anglisë ruan stimujt monetarë. Vendi përballet me Brexit dhe rikthimin e masave të karantinës
Banka e Anglisë la normat e interesit të pandryshuara dhe ruajti programin e blerjes së obligacioneve në 745 miliardë paund. Të gjithë anëtarët e Komisionit të Politikave Monetare votuan për të mbajtur normën bazë të interest në 0.1%, ndërkohë që banka qendrore e ka ulur dy herë nga 0.75% që qëndronte përpara pandemisë së koronavirusit. Britania përballet me rrezikun e Brexit pa marrëveshje, pas kalimit të ligjit në parlament që bie ndesh me marrëveshjen e divorcit të nënshkruar në muajin janar.
Vendi po goditet gjithashtu nga rritja e rasteve të koronavirusit, që ka rikthyer disa masa të kufizimit social. Një tjetër rrezik për Britaninë është përfundimi i skemës së mbrojtjes së vendeve të punës nga Qeveria muajin e ardhshëm, që mbështeste miliona punëtorë gjatë pandemisë. Ekonomia britanike u tkurr me një normë rekord prej 20.4% në tremujorin e dytë, ku hyri zyrtarisht në recesion. Vendi pati shenja të rimëkëmbjes, pasi u rrit me 6.6% në muajin Korrik, si pasojë e heqjes graduale të masave. Megjithatë, rritja e numrit të infeksionit në mbi 3,000 në ditë, ka detyruar qeverinë që të aplikojë rregulla të reja të distancimit social dhe masa lokale të karantinës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.