Banka e Japonisë mban stimujt – Norma bazë në -0.1%, yield-i 10-vjeçar në 0%, thekson rreziqet tregtare

Banka e Japonisë mbajti politikat monetare të pandryshuara në takimin e kësaj jave, dhe dha një perspektivë optimiste për ekonominë, pavarësisht përshpejtimit të tensioneve tregtare. Banka Qendrore mbajti objektivin për normat e interesit afat-shkurtër në -0.1% dhe premtoi se do të drejtojë yield-in e titujve 10-vjeçarë të Qeverisë në 0%, një lëvizje që pritej gjerësisht nga tregjet financiarë.

Institucioni la gjithashtu të pandryshuar udhëzimet e adaptuara në Korrik, ku premtoi se do të mbajë normat e interesit në një nivel rekord të ulët për një periudhë të tejzgjatur. Vendimi për mbajtjen e normave të interesit të pandryshuara erdhi me një votim 7-2 te anëtarët e bordit.

“Ekonomia e Japonisë po vazhdon të rritet me një ritëm të moderuar”, tha guvernatori Haruhiko Kuroda në konferencën pas takimit të politikave monetare. Ndërkohë që inflacioni i ulët e ka detyruar që të mbajë stimujt masivë për më gjatë, Banka e Japonisë ka ndryshuar kuadrin e politikave monetare, duke lejuar interesat e borxhit që të lëvizin në mënyrë më fleksibël drejt objektivave.  Konfliktet tregtare sollën rënien më të madhe në 2 muaj të jenit japonez kundër dollarit, në 112.39.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.