Banka e Japonisë nuk ndërhyn – Heq afatin kohor për arritjen e objektivit të inflacionit 

Banka e Japonisë mbajti politikat monetare të pandryshuara në takimin e muajit Prill dhe hoqi afatin kohor për arritjen e objektivit të inflacionit në 2%. Banka e Japonisë mbajti normën bazë të interesit në -0.1% dhe objektivin për yield-in 10-vjeçar në zero, si ç’pritej gjerësisht.

Në projeksionet e reja tremujore, institucioni la parashikimin për inflacionin për vitin e ardhshëm fiskal të pandryshuar, në 1.8%, duke theksuar se rimëkëmbja ekonomike do të mbështesë rritjen e çmimeve drejt nivelit objektiv.

Megjithatë,  nëpërmjet një lëvizjeje që nuk pritej, Banka e Japonisë hoqi afatin kohor për arritjen e objektivit të inflacionit, duke pranuar se arritja e nivelit prej 2% ka marrë më shumë kohë se ç’duhet.

Banka Qendrore është detyruar në mënyrë të vazhdueshme që të zgjerojë afatin që i duhet për të arritur objektivin. Takimi i fundit vjen 5 vite pasi guvernatori Haruhiko Kuroda prezantoi programin e blerjes së aktiveve, që synonte nxjerrjen e Japonisë nga deflacioni.

Blerjet e mëdha të obligacioneve nga banka kanë mbajtur yieldin e titujve të qëndrueshëm, pavarësisht se yield-i 10-vjeçar benchmark në SHBA preku 3% për të parën herë në katër vite gjatë javës.

Kjo ka bërë që diferenca e yieldit mes SHBA dhe Japonisë të zgjerohet në favor të dollarit, duke zhvlerësuar jenin dhe nxitur ekonominë e varur nga eksportet të Japonisë.

Jeni i dobët është i mirëpritur nga politikëbërsit japonez, për shkak se i jep eksportuesve të vendit avantazh dhe nxit inflacionin nëpërmjet kostove të importit.  Ekonomia e tretë më e madhe në botë u rrit me 1.6% në tremujorin e fundit të 2017-ës dhe shënoi tremujorin e 8 radhazi të rritjes.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.