Banka e Shqipërisë miraton Raportin Vjetor. Dokumenti themeltar për veprimtarinë e institucionit i prezantohet Kuvendit
Banka e Shqipërisë ka bërë me dije se në mbledhjen e fundit të Këshillit Mbikëqyrës ka miratuar edhe Raportin Vjetor për vitin 2020 ku janë të pasqyruara të gjitha vendimet e marra nga insiticuioni qëndror lidhur me politikat ekonomike si edhe rapotin e fitimit vjetor.
Në raport ndër të tjera pasqyrohen edhe zhvillime të tjera makroekonomike në vend, si edhe aktivititeti mbikëqyrës i kryer për të mbajtur tregjet dhe aktorët financiarë nën kontroll:
Njoftimi i plotë:
Në mbledhjen e tij të datës 3 mars 2021, Këshilli Mbikëqyrës i Bankës së Shqipërisë mori në shqyrtim dhe vendosi:
- Miratimin e Raportit Vjetor të Bankës së Shqipërisë për vitin 2020
Raporti vjetor përbën një detyrim ligjor të Bankës së Shqipërisë, me anë të të cilit realizohet llogaridhënia para Kuvendit të Shqipërisë dhe komunikimi me sistemin financiar, mediat dhe publikun. Ai përbën dokumentin më të rëndësishëm që, në mënyrë transparente, informon Kuvendin mbi vendimmarrjen e Këshillit Mbikëqyrës dhe veprimtarinë e Bankës së Shqipërisë, në përmbushje të objektivave të saj institucionalë, monetarë, operacionalë dhe zhvillimorë.
Në raport, ndër të tjera, pasqyrohen:
- zhvillimet e përgjithshme makroekonomike në vend;
- politika monetare dhe ajo valutore e ndjekur nga Banka e Shqipërisë;
- zhvillimet në sistemin bankar dhe rreziqet potenciale me të cilat përballet stabiliteti financiar;
- aktiviteti mbikëqyrës, licencues dhe rregullator;
- aktiviteti i emisionit monetar, i sistemit të pagesave, statistikor, kërkimor, komunikues dhe ai i edukimit të publikut;
- administrimi i burimeve njerëzore;
- veprimtaria e kontrollit të brendshëm;
- objektivat afatmesëm të institucionit.
Pas prezantimit të tij në Kuvendin e Shqipërisë, çdo i interesuar mund të gjejë një kopje të plotë të Raportit Vjetor 2020, në faqen tonë të internetit: http:/www.bankofalbania.org/.
Gjatë mbledhjes së sotme, Këshilli Mbikëqyrës shqyrtoi dhe miratoi shpërndarjen e fitimit të Bankës së Shqipërisë për vitin 2020.
Këshilli Mbikëqyrës u njoh dhe me informacione të tjera të lidhura me veprimtarinë e përditshme funksionale dhe operacionale të Bankës së Shqipërisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.