Banka e Shqipërisë vlerëson shëndetin bankar – Nuk ka rreziqe të shtuara, vendos në 0% normën e shtesës së kapitalit
Banka e Shqipërisë ka vendosur në 0% normën e shtesës kundërciklike të kapitalit për sistemin bankar në vendin tonë, duke vlerësuar pozitivisht një sërë faktorësh kyç, si dhe duke sinjalizuar se bankat që operojnë në vend gëzojnë një shëndet mjaft të mirë financiar pavarësisht krizës që po kalon ekonomia dhe i gjithë globi. “Shtesa kundërciklike e kapitalit është një instrument makroprudencial dhe përfaqëson një shtesë mbi kapitalin baze të nivelit të parë të bankave.
Objektivi kryesor i këtij instrumenti është të forcojë elasticitetin e sistemit bankar duke rritur shtesat e kapitalit të bankave gjatë periudhave të rritjes së rrezikut sistemik. Shtesa kundërciklike e kapitalit i shtohet kërkesave minimale të kapitalit për bankat. Kjo shtesë caktohet midis 0% – 2.5%, por mund të vendoset edhe më e lartë kur rreziqet të cilat lidhen me rritjen e tepërt të kredisë ose rreziqe të tjera sistemike, vlerësohen të jenë të larta”-nënvizon Banka e Shqipërisë në arsyetimin e vendimit që mban firmën e Guvernatorit të Bankës së Shqipërisë.
Pra, sipas bankës, rreziqet që paraqet ekonomia shqiptare për momentin nuk sjellin risk të shtuar për likuiditet në bankat e vendit. Treguesit që merren në vlerësim për të vendosur normën e shtesës së kapitalit, variojnë që nga kredia për ekonominë e deri te rritja e çmimit të banesave.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.