Banka Europiane e Investimeve: 20 miliardë euro për sektorin privat të Ballkanit Perëndimor deri në 2027
Struktura e Garancisë së Ballkanit Perëndimor i BE-së mund të sigurojë deri në 20 miliardë euro për sektorin privat në rajon deri në vitin 2027, tha Zëvendës Presidentja e Bankës Europiane të Investimeve Lilyana Pavlova për Reuters. “Ne e dimë që NVM-të (ndërmarrjet e vogla dhe të mesme) janë shtylla kurrizore e ekonomisë europiane dhe se ajo përbën 70% të ekonomisë,” tha Pavlova.
Ajo tha se struktura e Ballkanit Perëndimor do të funksionojë deri në fund të vitit. Gjashtë vende në rajon – Shqipëria, Bosnja, Kosova, Mali i Zi, Maqedonia e Veriut dhe Serbia – të gjitha synojnë të bashkohen në Bashkimin Europian dhe për t’i bërë ekonomitë e tyre konkurruese, atyre u duhet të ulin gjurmët e shtetit në ekonomitë e tyre.
Tetorin e kaluar, Komisioni Europian miratoi një plan investimi që parashikon 9 miliardë euro për Ballkanin Perëndimor. Struktura e Garancisë së Ballkanit Perëndimor është pjesë e këtij plani. Nëntë miliardë euro do të investohen kryesisht në dixhitalizimin, infrastrukturën e transportit, sektorin e kujdesit shëndetësor dhe mjedisin, i tha Pavlova Reuters.
“Tani kemi 2.3 miliardë euro në ndërtim për projektet në rajon. Shumica e atyre projekteve do të zbatohen këtë vit dhe vitin tjetër, ”tha Pavlova. Në maj, BEI miratoi një paketë financiare prej 1.7 miliardë eurosh për të ndihmuar shtetet e Ballkanit Perëndimor të zbusin efektet negative të krizës COVID-19.
Pavlova tha se pandemia ka treguar se ekziston nevoja për të krijuar një treg të përbashkët rajonal. “Zhvendosja e prodhimit në rajon do të ndihmonte në luftën kundër ndërprerjeve të furnizimit,” tha ajo. Ajo tha se banka shpreson që një projekt i dixhitalizimit të shkollës prej 65 milion euro vitin e kaluar, që synon futjen e internetit me shpejtësi të lartë në shkollat serbe, do të kopjohet në vendet e tjera. Vetëm në 10 vitet e fundit, BEI ka investuar mbi 8 miliardë euro në rajon për modernizimin e infrastrukturës dhe zhvillimin e sektorit privat. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.