Bankat dhe modeli ekonomik – Sejko: Çojini paratë në sektorë produktivë
Guvernatori i Bankës së Shqipërisë, Gent Sejko, risolli të martën në vëmendje rëndësinë e sistemit bankar për të ndërtuar një model ekonomik më të qëndrueshëm. Gjatë konferencës me rastin e 20-vjetorit të Shoqatës Shqiptare të Bankave, Sejko tha se bankat duhet të përpiqen t’i alokojnë fondet në sektorët më produktivë dhe që paraqesin më shumë potenciale zhvillimi afatgjatë.
Ndërkohë, guvernatori përsërit edhe njëherë apelin që bankat të luajnë më mirë rolin e tyre në drejtim të ndërmjetësimit sasior: e thënë thjesht, të japin më shumë kredi për bizneset dhe familjet.
Në dekadën që ndoqi shpërthimin e krizës financiare ndërkombëtare, sistemi bankar në Shqipëri u përball me sfidat e rënies së kërkesës, rritjes së kredive me probleme dhe largimit të disa prej aktorëve të rëndësishëm të tregut. Tashmë, kreditë me probleme janë vënën nën kontroll, ndërsa procesi i ristrukturimit dhe konsolidimit të tregut po finalizohet.
Në këto rrethana, Banka e Shqipërisë kërkon nga sistemi bankar ngritjen e një cikli të ri të rritjes së huadhënies, mbi baza më të shëndetshme dhe më të qëndrueshme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.