Bankat europiane në Britani – BOE do të lejojë institucionet që të operojnë normalisht pas Brexit
Banka e Anglisë do të lejojë institucionet bankare të Bashkimit Europian që të vazhdojnë të shesin shërbimet e tyre në Mbretërinë e Bashkuar, pa qenë nevoja të krijojnë filiale të kushtueshme pas divorcit, raporton BBC.
Ky vendim, nëse konfirmohet, nënkupton se bankat europiane që operojnë në Londër nuk do të përballen me pengesa të lidhura me Brexit.
BE kishte propozuar se klerimi i produkteve derivate të denominuara në euro që kryhet kryesisht në Londër të zhvendoset në Eurozonë pas Brexit.
Duke lejuar degë të bankave europiane në Londër që të mbikqyren nga rregullatori vendas, Britania shpreson që blloku të lejojë sistemin e shlyerjes së pagesave në euro që të qëndrojë në Britani.
Ky veprim mund të zbusë gjithashtu planet e Komisionit Europian për të ashpërsuar kushtet e lejimit të bankave të investimeve jashtë bllokut që të operojnë brenda BE-së.
Shumë prej këtyre bankave, si Goldman Sachs dhe Morgan Stanley kanë aktualisht operacionet kryesore europiane të vendosuar në Londër.
Më shumë se 100 banka që operojnë në Londër janë degë të huadhënësve me seli në Bashkimin Europian dhe operojnë aktualisht nëpërmjet të drejtës për të bërë biznes në Zonën Ekonomike Europiane (passaporting) , gjë që mund të skadojë pas daljes së Britanisë në 2019-ën.
Banka e Anglisë ka deklaruar më parë se do t’i japë informacion bankave përpara fundit të këtij viti, nëse këto degë do të duhet të riaplikojnë për licencë që të operojnë pas Brexit, apo nëse do të duhet të kthehen në filiale, një opsion që shumë analistë thonë se do të jetë i kushtueshëm.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.