Bankat greke bëjnë progres – Kalojnë objektivat në reduktimin e kredive të këqija

Bankat greke kanë bërë progres të mëtejshëm gjatë tremujorit të katërt 2017, në reduktimin e ekspozimeve dhe kredive të këqija (NPLs), sipas të dhënave të Bankës Qendrore.

Ekspozimet jo performuese (NPEs) janë sfida më e madhe që përballet sektori dhe në fund të Dhjetorit kishin rënë me 4.7 miliardë euro në 95.7 miliardë në total, apo në 43.1% të librit të kredive të bankave.

Bankat greke kanë qenë nën presion rregullator së fundmi për të trajtuar problemet me borxhin e keq, që kufizojnë aftësinë për të rritur kreditimin dhe nxitur rimëkëmbjen ekonomike.

Kriza e borxhit që prej vitit 2010 ka çuar papunësinë në vend në 28%,  gjë që solli dështimin për t’i shërbyer borxheve nga huamarrësit.  Ekspozimet jo-performuese përbëhen nga kreditë e ristrukturuara që kanë shumë gjasa për të dështuar dhe kredive të këqija (NPLs), që kanë vonesë në pagesa me 90 ditë e sipër.

Ulja e këtyre do të lironte më shumë kapital për të financuar sektorë produktivë të ekonomisë. Huadhënësit grek kishin një total të këtyre ekspozimeve në 14.5 miliardë euro apo 5.5% të totalit të kredive, përpara se të niste kriza globale financiare në vitin 2008.

Ndërkohë që kjo shumë u fry në 106.9 miliardë euro apo 50.5% të totalit të kredive në tremujorin e dytë 2016, huadhënësit ranë dakord me Bankën Qendrore Europiane që t’i reduktojnë këto në 64.6 miliardë euro deri në fund të 2019-ës.

Ky proces pati suksesin më të madh në tremujorin e katërt 2017, sipas Bankës Qendrore të vendit, kryesisht nga fshirjet nga bilanci  në vlerën e 2.1 miliardë euro dhe shitjes së kredive në 1.8 miliardë.

Tremujori i katërt tregoi gjithashtu përmirësime në mbledhje dhe likuidime.  Norma e dështimeve (default) është ngadalësuar, duke rënë poshtë normës së rikthimit të kredive në statusin performues (cure rate).

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.