Bankat i japin shpresë biznesit – Oferta për kredi pritet të përmirësohet

Bankat mund ta lehtësojnë standardet e kreditimit të biznesit në tremujorin e parë të këtij viti. Vrojtimi i Aktivitetit Kreditues, i kryer nga Banka e Shqipërisë, tregoi se kreditimi i biznesit ngeli i shtrënguar në tremujorin e katërt 2018, por, së paku, bankat dhanë sinjale më pozitive për fillimin e këtij viti.

Bankat presin ti lehtësojnë disi standardet e kreditimit për bizneset këtë tremujor, sidomos në kreditë për qëllime likuiditeti. Sipas Bankës së Shqipërisë, për 11 mujorin e vitit 2018 kredia e re për biznesin kishte vlerën e 171 miliardë lekëve, në rënie me 15 miliardë lekë ose rreth 8% krahasuar me të njëjtën periudhë të një viti më parë.

Ndërkohë, edhe kërkesa për kredi e bizneseve u raportua më e lartë në tremujorin e katërt të vitit. Ajo u perceptua nga bankat më e lartë sidomos në segmentin e bizneseve të mëdha, në kredinë për financimin e investimeve.

Nga ana tjetër, bankat kanë lehtësuar më tej kreditimin e individëve në tremujorin e fundit të vitit të kaluar. Sipas Bankës së Shqipërisë, ky lehtësim u manifestua në të dyja kategoritë, si për kreditë për blerje banese, ashtu edhe për kreditë konsumatore. Lehtësimi i standardeve të kreditimit erdhi sidomos nga konkurrenca në sistemin bankar, si edhe nga gjendja e lartë e likuiditetit të bankave.

Bankat madje  u shprehën për një lehtësim të mëtejshëm të pritur të standardeve të kreditimit për individët edhe në tremujorin e parë të vitit 2019.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.