Bankat në 2018 – Sfidë, rritja e kreditimit dhe “bilancet e dyta”
Për sistemin bankar, viti 2017 u mbyll me performancën më të mirë të viteve të fundit. Fitimi vlerësohet në nivelet më të larta historike, ndërsa kreditë me probleme kanë zbritur në nivelet më të ulëta të shtatë viteve të fundit.
Ekspertët e sistemit bankar mendojnë se viti 2018 nis me baza mjaft pozitive për sistemin bankar, sidomos falë uljes së ndjeshme të nivelit të kredive me probleme. Megjithatë, çështja kryesore për vitin 2018 ngelet rritja e kreditimit, sidomos në segmentin e biznesit.
Eksperti Elvin Meka shprehet se detyrimi për të dhënë kredi vetëm mbështetur në bilancet zyrtare të kompanive do të jetë një sfidë për bankat dhe për bizneset.
Sipas tij, ky hap është një lëvizje pozitive në drejtim të formalizimit të ekonomisë. Ai madje mendon se, për të përmirësuar më tej formalizimin dhe transparencën qeveria, mund të ndërmarra edhe hapa të tjerë. Një ide mund të jetë regjistrimi me detyrim në bursë i bizneseve që plotësojnë kritere të caktuara për sa i takon madhësisë.
Një veprim të tillë e ka ndërmarrë prej vitesh Maqedonia fqinje. Kjo jo vetëm do të ndihmonte formalizimin e ekonomisë, por do t’i hapte rrugë edhe zgjerimit të tregut financiar në vend.
Rritja e kreditimit është në thelb e lidhur me një kërkesë të shëndetshme të sektorit privat për kredi. Kjo kthen debatin e modelit ekonomik që duhet të adoptojë vendi. Zori Meka është i mendimit se rritja ekonomike dhe kërkesa për kredi do të varen nga shfrytëzimi i potencialeve të sektorëve si bujqësia apo turizmi.
Në veçanti për bujqësinë, ai është i mendimit se duhet ngritur një model për të nxitur gjithë zinxhirin e vlerës në këtë sektor.
Zoti Meka mendon se normat e interesit edhe këtë vit do të qëndrojnë të ulëta, duke favorizuar investimet e reja në ekonomi. Sipas tij, rritja e konsumit privat është ende modeste, me presione të dobëta për rritjen e inflacionit.
Në këto kushte, as për vitin 2018 nuk është e pritshme që të ketë ndryshim në kursin e politikës monetare dhe të kahut të interesave në tregun financiar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.