Bankat në Eurozonë – BQE: Priten më shumë blerje dhe shkrirje brenda sektorit
Aktiviteti i shkrirjeve në sektorin bankar të Eurozonës ka gjasa të marrë vrull, nxitur nga rritja e fortë ekonomike dhe reduktimi i borxhit të keq, tha shefja e mbikëqyrjes të Bankës Qendrore Europiane, Daniele Nouy.
BQE ka patur prej kohësh qasje kritike ndaj numrit të madh të institucioneve në Europë, gjë që redukton efiçencën e sektorit dhe limiton fitimet. Kjo përbën një problem pasi huadhënësit e dobët nuk mund të transmetojnë plotësisht politikat stimuluese të Bankës Qendrore në ekonominë reale.
“Në një kohë të rimëkëmbjes ekonomike dhe përpjekjeve të mëdha në reduktimin e kredive me probleme, ne do të shohim disa shkrirje brenda vendeve si dhe jashtë kufijve”, argumenton shefja e mbikëqyrjes të BQE.
Daniele Nouy mbrojti gjithashtu përpjekjet e BQE për të ulur nivelin e kredive me probleme (NPL) por shtoi se udhëzimet e fundit mbi kreditin e ri të keq mund të vonohen disa muaj për shkak të informacionit të marrë nga industria.
Megjithatë, Nouy shtoi se një propozim tjetër për të trajtuar stokun ekzistues me një vlerë prej 800 miliardë euro do të vijë në tremujorin e parë të 2018-ës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.