Bankat qendrore, me shpejtësi të ndryshme – Georgieva: Vendet me borxh të lartë në dollarë, do të ndikohet nga rritja e interesave në SHBA

Bankat qendrore më të mëdha në botë, duke lëvizur së bashku në kulmin e pandemisë, janë të vendosura të shtrëngojnë politikat monetare por me shpejtësi jashtëzakonisht të ndryshme. Por, sipas politikëbërësve kryesorë, me shumë gjasa kjo do të rrisë paqëndrueshmërinë e tregjeve dhe të ekonomisë, gjatë këtij viti. Në përgjigje të pandemisë, bankat qendrore hodhën stimuj të paprecedentë në vitet e fundit, për të mbështetur rritjen ekonomike, por paratë e tepërta tani po e shtyjnë inflacionin në nivelet më të larta në disa dekada.

Rezerva Federale në Shtetet e Bashkuara të Amerikës pritet të jetë e para mes bankave qendrore më të mëdha në botë që do të rrisë normat e interesit, mbase që në takimin e radhës më 25 dhe 26 janar. Ndërsa Banka e Japonisë ka gjasa t’i mbajë politikat monetare jashtëzakonisht lehtësuese për vitet në vijim.

“Problemi është se ajo që bën Rezerva Federale ka ndikime për Shtetet e Bashkuara, por ka ndikimet edhe për vendet e tjera, sidomos për ato vende që kanë nivele të larta të borxhit të denominuar në dollarë”, deklaroi Drejtoresha e Fondit Monetar Ndërkombëtar, Kristalina Georgieva. “Kjo mund të shtojë problemet për vendet që po përballen me një rimëkëmbje të ngadaltë”, shtoi Georgieva në panelin e Forumit Ekonomik Botëror. Sipas saj, vendet me një nivel të lartë të borxhit në dollarë amerikanë duhet të rifinancohen tani, në mënyrë që të mos kenë probleme në të ardhmen.

Pritshmëritë për rritjen e shpejtë të interesave nga Rezerva Federale i kanë rritur kostot e huamarrjes në të gjithë botën. Për shembull, yield i obligacioneve 10-vjeçare të qeverisë gjermane u rikthye në territor pozitiv për herë të parë që nga fillimi i vitit 2019. Gjithashtu, gjatë fjalës së saj në Forumin Ekonomik Botëror, Georgieva tha se kontrolli i pandemisë dhe rritja e normave të vaksinimit është e domosdoshme për të trajtuar zgjerimin e hendekut mes vendeve të pasura dhe atyre të varfëra.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.