Bankat shqiptare “parakalojnë” fqinjet – 100 bankat më të mëdha: “Abi” dhe “Credins”, rritjen më të madhe të aseteve
Ashtu si çdo vit, edhe këtë Qershor, “SeeNews” ka publikuar raportin e 100 bankave më të mëdha në rajonin e Europës juglindore.
Në raportin e këtij viti, Shqipëria përfaqësohet në listën e 100 bankave me 7 institucione bankare. Të 7 këto banka regjistrojnë një rritje në renditje, duke shënuar një performancë mjaft të mirë të sektorit në vendin tonë. Për disa prej tyre, rritja vjen edhe si rrjedhojë e konsolidimit të sektorit përgjatë 2018-ës. Bankat që kanë pësuar përmirësimin më të madh në renditje janë: “ABI Bank” me 38 pozicione, nga vendi i 128-të, në të 90-tin, “Alpha Bank”, nga vendi i 97-të në të 89-tin, “Intesa San Paolo”, nga vendi i 65-të në të 55-tin, si dhe “Credins Bank”, që është ngjitur në vendin e 47-të, nga vendi i 55-të që ishte një vit më parë.
Kështu, të 7 bankat shqiptare pjesë e listës së 100 më të mëdhave në rajon, kanë parakaluar të paktën 1 bankë tjetër të rajonit gjatë 1 viti. Renditja bëhet mbi totalin e aseteve në vitin 2018 dhe tregon se, ndër shqiptaret, e para në listë është “BKT”, në vendin e 23-të, më pas ndjek Raiffeisen e 42-ta e më pas “Credins” në vendin e 47-të. Sa i përket rritjes së aseteve ndërkohë, në harkun e një viti, mes shqiptareve, “Abi” është e para, me 83% rritje, ndërkohë që fill më pas ndjek “Credins”, me 9.09% .
Bankat e tjera ndërkohë, ose kanë pësuar rënie të totalit të aseteve, ose janë rritur me një hap mjaft të ngadaltë. Kjo nuk i ka penguar disa prej tyre të ngjiten në renditjen rajonale, duke shfrytëzuar rënien më të madhe të bankave të tjera të Europës juglindore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.