Banorët e Moskës nuk vaksinohen – Alarmi i kryebashkiakut: Kemi krijuar lehtësi, ndërsa po rriten infektimet dhe vdekjet

Kryetari i Bashkisë së Moskës Sergei Sobyanin deklaroi se pak banorë kishin zgjedhur të vaksinohen kundër COVID-19 megjithë lehtësitë që janë ofruar që nga muaji janar. Spitalet në kryeqytetin rus vazhdojnë të jenë pranë kapaciteteve maksimale me pacientë të sëmurë dhe me raste të vdekjeve në nivele të larta, pavarësisht se vaksinat kundër COVID-19 janë gjerësisht të disponueshme për gati gjashtë muaj.

“Është e jashtëzakonshme. Njerëzit po sëmuren, ata vazhdojnë të sëmuren, ata vazhdojnë të vdesin. E megjithatë ata ende nuk duan të vaksinohen,” tha Sobyanin.

Rusia ishte vendi i parë në botë që miratoi një vaksinë COVID-19 për përdorim të brendshëm, para fillimit të provave në shkallë të gjerë. Përhapja e vaksinës Sputnik V filloi në dhjetor dhe në kryeqytet u hap me shpejtësi për të gjithë. Që nga fillimi i këtij viti, çdo banor i Moskës duhet të paraqitej pranë qendrave shëndetësore vetëm me kartën e identitetit për të bërë vaksinën.

“Ne ishim qyteti i parë i madh në botë që njoftuam fillimin e vaksinimit masiv. Por, deri më sot përqindja e njerëzve të vaksinuar në Moskë është më e vogël se në çdo qytet europian”, tha Sobyanin.

Për të shpejtuar procesin e vaksinimit, qendra të posaçme u hapën edhe në qendrat tregtare dhe parqet e Moskës, ndërsa të moshuarve ju është ofruar pagesa indirekte si një nxitje shtesë. Megjithatë, vetëm 1.3 milion njerëz në Moskë kanë marrë një dozë deri më tani, nga 12 milion banorë.

Një sondazh i pavarur i kryer në fillim të marsit tregoi se 62% e rusëve nuk ishin të gatshëm të merrnin vaksinën Sputnik V, me moshat 18 deri 24 vjeç më ngurrues.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.