Banorët i kanë blerë prej vitesh, por s’kanë tapi – Formalizohen 636 pallate të braktisura nga ndërtuesit, 12 mijë familje marrin certifikatat e pronësisë
Gjatë vitit 2020 janë legalizuar 158 pallate të braktisura nga ndërtuesit apo me shkelje të lejeve duke bërë të mundur që familjet të arrijnë të regjistrojnë në kadastër këto pasuri. Sipas të dhënave zyrtare të sapopublikuara nga Agjencia Shtetërore e Kadastrës në total rreth 12 mijë familje dhe 1,200 biznese kanë përfituar prej formalizmit të objekteve nga Agjencia e legalizimit të Ndërtimeve pa Leje. Agjencia bën me dije se për harkun kohor 2014-2020 janë formalizuar në total 636 pallate.
Bëhet fjalë për pallate të ndërtuara pa leje ndërtimi, me shkelje të lejes së ndërtimit, rastet kur kompanitrë ndërtuese kanë falimentuar apo e ka braktisur procesin e legalizimit, ndërkohë që objektet banohen prej vitesh e banorët nuk kanë mundësi t’i regjistrojnë në kadastër.
Problemi i këtyre pallate është i bartur prej vitesh dhe vlerësohet se janë rreth 30 mijë apartamente në total që presin t’i nënshtrohen këtij procesi për të bërë të mundur që qytetarët të mund t’i regjistrojnë në zyrat kadastrale.
Sipas të dhënave zyrtare të Agjencisë së Kadastrës, Rreth 210 mijë legalizime janë kryer gjatë viteve të fundit, që do të thotë se procesi është mbyllur për pjesën dërrmuese të ndërtimeve pa leje në gjithë territorin. Ndërkaq, rreth 94 mijë objekte rrezikohen të mos kualifikohen për t’u legalizuar, duke shpjeguar se legjislacioni aktual siguron që pronarët të kompensohen për vlerën e objektit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.