Barbiet rezultojnë “negative” ndaj COVID – 19! Kompania gjigande raporton rritje me 348% të shitjeve. Rekord për dekadën e fundit

Nëse mendonit se në periudhën e pandemisë dhe karantinimit fëmijët e kanë kaluar kohën e tyre vetëm përpara televizorit, smartfonë-ve apo videolojrave, rezulton ndryshe! Raporti 3 mujor i Mattel, kompanisë më të madhe në botë për shpërndarjen dhe shitjen e kukullave Barbie dhe makinave “super të shpejta” ‘Hot Wheels’ ka treguar të kundërtën. Sipas gjigandit të lodrave, raporti statistikor është ai më i miri në 10 vitet e fundit. Shifrat tregojnë një fitim neto prej 316 milionë dollarësh, një rritje kjo me 348%, krahasuar me një vit më parë.

Më konkretisht, shitjet e gjithçkaje që vërtiten rreth botës së Barbie-t u rritën me 29%, duke prodhuar një rritje në xhiron e Mattel në 1.6 miliardë dollarë. Thënë ndryshe, prindërit kanë blerë më shumë lodra për fëmijët e tyre.

Për t’i argëtuar ata, “të lidhur” nga shtëpia, por edhe si një mjet për të kompensuar atë që po kalojnë.

“Ne po punojmë shumë për të përmbushur kërkesën në rritje. Prindërit shpenzojnë për fëmijët e tyre dhe kërkojnë mbi të gjitha produkte cilësore, me çmime të mira, nga marka të besueshme”, deklaroi CEO i përgjithshëm Ynon Kreiz, i kënaqur me shumicën dërrmuese.

Në përgjithësi, rritja është ndjerë nga klientët e klasave të mesme – veçanërisht në ekonomitë në zhvillim, si në Azi. Sidoqoftë, rritja është përhapur në të gjitha kontinentet: në Europë, për shembull, Mattel raportoi një rritje prej 16% të xhiros.

Burimi Origjinal: La Repubblica

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.