Bartja e numrit – Vonesa dhe zvarritje të gjata nga operatorët
Shërbimi i bartjes së numrit ka qenë një nga zhvillimet më të rëndësishme për nxitjen e konkurrencës në tregun e komunikimeve, duke filluar nga viti 2011. Të dhënat statistikore nga Autoriteti i Komunikimeve Elektronike dhe Postare, tregojnë se, vetëm vitin e kaluar, u bartën afro 151 mijë numra celularë mes operatorëve të ndryshëm.
Por, prej muajsh, bartja e numrit mes operatorëve të ndryshëm është bërë një proces problematik, që në shumë raste dështon.
Në kushte normale, bartja e numrit duhet të kryhet brenda tre ditësh pune, por, në fakt, përdoruesit që duan të transferojnë numrin përballen me vonesa të gjata dhe shpeshherë bartja dështon. Në raste të tjera, janë vetë përdoruesit që heqin dorë, për shkak të zvarritjeve.
Sipas burimeve nga Autoriteti i Komunikimeve Elektronike dhe Postare, vonesat vijnë për arsye të ndryshme, ku nuk përjashtohen edhe pengesat që nxjerrin operatorët dhënës. Duke mos pasur interes të humbasin përdorues, operatorët shpeshherë e zvarrisin procesin.
Një nga argumentet e tyre është mospërputhja mes të dhënave të klientit aplikues me të dhënat me të cilat numri është regjistruar. Sipas AKEP, ky është një argument që në shumë raste qëndron, megjithatë, është e vështirë të thuhet se ku mbarojnë pengesat objektive dhe ku fillojnë pengesat e qëllimshme që nxjerrin vetë operatorët.
Për t’u ankuar ndaj këtyre pengesave, përdoruesit kanë të drejtë të ankohen pranë AKEP, që mund të detyrojë operatorin dhënës ta kryejë bartjen e numrit, në rastet kur nuk ka pengesa të justifikuara.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.