Basha akuzon qeverinë për krizën ekonomike: “Plani ekonomik i PD do ta rikthejë vendin në normalitet”

Kreu i Partisë Demokratike Lulzim Basha i është përgjigjur kryeministrit Rama, duke e akuzuar si përgjegjës për krizën ekonomike që po përjeton vendi. Në një prononcim për mediat, Basha u ndal tek plani ekonomik i Partisë Demokratike, duke thënë se ky plan do t’i rikthejë normalitetin vendit, duke krijuar një klimë pozitive për ekonominë.

“Ne kemi një plan konkret ekonomik. Së bashku me shqiptarët në 25 prill do të largojmë të keqen dhe do të nisim rrugën e ndryshimit. Dhe në këtë rrugë ndryshimi partnerët tanë gjeostrategjikë duke përfshirë Bashkimin Europian do të na mbështesin me një plan ekonomik që do të bëjë të mundur që Shqipëria shumë shpejt t’i kthehet normalitetit, që Shqipëria shumë shpejt të ketë një klimë pozitive ekonomike për investimet e brendshme, për biznesin e vogël dhe të mesëm që është edhe më i godituri i kësaj krize, për të gjitha familjet shqiptare që po vuajnë dështimet e Edi Ramës por po kështu për të krijuar një klimë pozitive për investimet e huaja. Mesazhi që kam sot për shqiptarët është: çdokush e di se Edi Rama ka dështuar por e nesërmja do të sjellë ndryshim, një ndryshim të vërtetë për të gjithë Shqipërinë dhe për të gjithë shqiptarë”

Basha teksa përcolli mesazhin për ndryshim, u shpreh se në krah të tij janë edhe partnerët strategjik përfshirë BE, për të mundësuar një realitet tjetër sa i takon ekonomisë së vendit.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.