Basha me investitorët italianë: Programi ynë ekonomik do mbështesë sipërmarrjen e ndershme

Në një takim me investitorët italianë, kreu i PD Lulzim Basha prezantoi platformën ekonomike të Partisë Demokratike, i cili shtoi se ajo është në mbështetje të investitorëve të huaj.

Sipas Bashës, programi ekonomik i PD do të mbështetesë sipërmarrjen e ndershme:

“Programi ekonomik i PD garanton rritjen e mundësive ekonomike të sipërmarrjes, garanton konkurrueshmërinë, e nxjerr ekonominë nga kriza dhe apatia. Është një program me taksa më të ulëta dhe vendos gjithçka në mbështetje të sipërmarrjes së ndershme”, u shpreh kreu i Demokratëve.

Më tej kreu i PD pohoi se “Shqipëria ofron mundësi të jashtëzakonshme për të bërë biznes. Në këtë rast duam t’i shprehim mirënjohjen investitorëve italianë, të cilët pavarësisht padrejtësive, i ftoj të shtrijnë investimet e tyre në vend. Investitorët e huaj sot vuajnë nga një ekonomi ku mungon liria, por PD do të ofrojë mbështetje për ta. Qeveria ime do të jetë përkrah jush. Sot kemi një alternativë zhvillimi që sjell qëndrueshmëri.”, theksoi lideri i PD.

Një pikë ku Basha u ndal gjatë fjalimit të tij ishin taksat “Me programin tonë ne do të eliminojmë taksat e fshehura. Platforma jonë parashikon taksa të thjeshta që çliron sipërmarrjen. Në themel të gjithçkaje është taksa e sheshtë prej 9 për qind. Tatimi mbi dividentin do të zërohet. TVSH-ja do të ketë një shkallë të vetme, 15 për qind”.

Nga ana tjetër Basha tha “Biznesi do të ciloret nga një mal me kërkesa të fshehura. 80 për qind e kërkesave për bizneset do të shmangen 3 muajt e parë të qeverisjes sonë” 

Sa i takon investimeve, kreu i PD pohoi se “Prioritet do të ketë përfundimi i veprave të mëdha siç është Korridori 8, Rruga e Arbrit, autostrada Tiranë-Elbasan, investimet në Ujësjellës-Kanalizime. Shqipëria ka nevojë për një port strategjik, ku do të krijohet një lidhje me vendet e Ballkanit. Projektet publike do të finalizohen me investimet publike”, tha Basha.

Gjithashtu ai u ndal edhe te rritja ekonomike, kur theksoi se do të ndodhë si pasojë e mirëmenaxhimit të borxhit publik.

Osman Dedja/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.