Basha në Fier dhe Vlorë: Disa zona të braktisura nga autoritetet, duhet ndihmë urgjente!

Kryetari i Partisë Demokratike, Lulzim Basha pa nga afër gjendjen në zonat e përmbytura në Fier dhe Vlorë.

Derëzeza në Fier ishte ndalesa e parë e kryedemokratit Basha, ku diskutoi me banorët për situatën e krijuar nga reshjet e dendura e më konkretisht nga vërshimi i Vjosës.

Gjatë kësaj vizite, Lulzim Basha falënderoi anëtarët e Forcave të Armatosura, të cilët po punonin për riparimin provizor të rrugës së shkatërruar. Ndërkohë në Ferras, zona më e prekur nga përmbytjet, banorët i thanë kreut të opozitës se janë braktisur plotësisht nga autoritetet qendrore dhe lokale. Një banore në Ferras i tregoi Bashës sesa e rëndë është situatë nga mungesa e ujit të pijshëm.

“Duhet të vijnë këtu t’ju mbështesin me ujë dhe ushqime se u bënë disa ditë në këtë gjendje”, u shpreh Basha.

“U bënë 3 ditë kështu. Tani po kullon uji dhe sot u hap rruga që u dhamë diçka fëmijëve”, tregon banorja në Ferras.

Kreu i Partisë Demokratike, Lulzim Basha vizitoi edhe zonën e Novoselës në Vlorë ku kërkoi nga autoritetet të mbështesin familjet e dëmtuara.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.