Basha në Fushë-Krujë tek zonat e përmbytura – Kërkesë qeverisë për ushqime dhe strehim për të prekurit

Kryetari i Partisë Demokratike, Lulzim Basha vizitoi zonat e përmbytura në Fushë-Krujë, ku bëri apel për ndërhyrje urgjente nga qeveria.

Edhe pse niveli i ujit ka rënë, situata vazhdon të jetë shumë e vështirë për qindra familje. Basha ishte brenda në Fushë-Krujë, ku janë përmbytur dy lagje, në fshatin Bilaj dhe në Hasan, ku banorët kanë 24 orë pa ushqime.

Ai i kërkoi Ramës të shkojë pranë njerëzve dhe t’i ndihmojë ata me ushqime, veshje dhe strehim. Por banorëve të përmbytur, dëmshpërblimi material nuk u mjafton dhe i kërkuan Bashës të kujdeset që të dalin përgjegjësit.

“Të bëjmë çdo përpjekje për të shpëtuar njerëzit. Kjo është e para. Pastaj të gjithë përgjegjësit do të mbajnë përgjegjësi”, tha kryedemokrati.

Në Fushë-Krujë Basha pati rastin të falenderojë të gjithë ata që po bëjnë gjithçka për të shpëtuar jetën e njerëzve.

“Edhe atyre njerëzve që kanë bërë sakrificë, ushtarë dhe policë u jam shumë mirënjohës. Se ata janë duke u përballur me rrezikun. I falenderoj nga zemra”, u shpreh Basha.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.