Basha, në krah të biznesit të vogël: “Paketë ndihme financiare për të dalë nga kriza”

1 mijë euro për çdo biznes të vogël për këto 6 muaj. Ky është propozimi i kreut të PD, Lulzim Basha,  pas një vizitë në disa biznese në kryeqytet ku theksoi se qeveria i ka lënë në  harresë . Basha  u ndal te plani 5 i PD sipas të cilit do të nxjerri vendin nga kriza ekonomike përmes paketave konkrete të ndihmës .

“Kemi një plan me 5 pika për të dalë nga kriza në 6 muajt e ardhshëm. Situata po përkeqësohet nuk po përmirësohet, ndaj kemi propozuar një cek me 1 mijë euro për ju. Ndërkohë për punonjësit që e kanë humbur punën të marrin 160 mijë lekë. Nëse i merr sërish vajzat që ke pasur në dyqan ti do marrësh 200 mijë lekë, për tju ndihmuar sado pak. Kjo duhet të vihet në zbatim një orë e më parë. Ne do na keni në krahë, sot kemi fjalën por nesër do na keni në krahë për të rritur konsumin dhe forcuar ekonominë. Mos u dorëzoni, pas 6 muajsh do keni në krahë një qeveri që nuk do jetë indiferente ndaj jush.”

Basha gjatë prononcimit për mediat komentoi dhe  ndryshimet kushtetuese të Kodit Zgjedhor duke e quajtur seancën e së hënës  një hap antikushtetues

“Shkatërrimi i institucioneve të Shqipërisë është arsyeja pse kjo bandë e ka katandisur kështu vendin. Hapat që merren sot janë thellësisht antikushtetues. Analizën e kanë bërë ekspertët e PD, por ky është tmerri dhe frika e Ramës nga procesi zgjedhor. S’ka formulë që e shpëton nga votimi popullor sikur vetëm nga premtimet e pa mbajtura ai do largohet me votë plebishitare nga shqiptarët.

Do kontestohet çdo hap antikushtetues si ky i sotmi që është në kundërshtim me 5 qershorin dhe standardet e OSBE, por s’ka formulë që e shpëton këtë bandë që e cilëson Shqipërinë si çifligun e saj. Ju lus mbajeni mendjen tek ekonomia, te shqiptarët që sot do e shtrojnë vaktin e radhës vetëm me bukë. Kjo është emergjenca kombëtare, hajdutët s’ka gjë që i shpëton.”

Kreu i PD u ndal në nevojën për ndryshim, sipas të cilit do ta sjellë vetëm largimi i kësaj qeverie dhe zbatimi i planit 5 pikësh të PD.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.