Basha në panairin e biznesit: “Sektorët me potenciale kanë nevojë për mbështetje nga shteti”
Edhe kryetari i Partisë Demokratike, Lulzim Basha, ka vizituar qytetin e Elbasanit me rastin e Ditës së Verës.
Gjatë vizitës së zhvilluar në panairin e biznesit, ajo që i tërhoqi vëmendjen kreut të opozitës ishte biznesi artizanal i krijuar nga bashkimi i disa grave, përpunimi i mjaltit dhe fabrika e prodhimit të paneleve fotovoltaike.
“Jam impresionuar veçanërisht nga disa biznese, kam parë bashkim vullnetar të zonjave shtëpiake që bëjnë punime dore; kam parë një përparim shumë të mirëpritur në përpunimin dhe mbledhjen e mjaltit dhe në veçanti jam impresionuar që në Elbasan ndodhet një nga fabrikat më të mëdha të paneleve fotovoltaike për prodhimin e energjisë. Përmenda këto të treja, i përzgjodha, sepse meritojnë mbështetje të drejtpërdrejtë nga shteti. Meritojnë mbështetje me ulje dhe pse jo, me heqje të taksave në disa raste dhe me subvencione për të krijuar një atmosferë sa më pozitive për mirëqenien dhe punësimin e shqiptarëve”.
I shoqëruar nga bashkëshortja e tij, Basha bëri edhe shëtitjen tradicionale në Bulevardin e Elbasanit, duke shkëmbyer urime me qytetarët për Ditën e Verës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.