Basha: Nesër kam thirrur forumet më të larta të PD në një konsultë me të gjithë opozitën për agjendën e aksionit politik!
Gjatë takimit me gazetarë të ndryshëm të mediave vendase, Basha njoftoi takimin që do të zhvillojë opozita për të përcaktuar rrjedhën e agjendës së opozitës.
“Kjo është rruga e vetme drejt Europës dhe ne jemi të vendosur për çdo sakrificë që të hapim derën e mbyllur të Europës, të hapin negociatat dhe ti japim Shqipërisë një qeveri përmes zgjedhjeve të lira dhe të ndershme.
Nesër kam thirrur forumet më të larta të Partisë Demokratike në një konsultë me të gjithë koalicionin e bashkuar të opozitës për agjendën e aksionit politik dhe protestën e qytetareve të bashkuar” nënvizoi Basha.
Përgjatë fjalës së tij, Kreu i PD falenderoi gazetarët për raportimin e tyre nga protestat e opozitës.
“Ky është momenti për të intensifikuar dhe për të vazhduar me vendosmëri betejën tonë. Kam marrë me mijëra mesazhe entuziazmi, optimizmi, përgëzimi, nuk më takojnë mua, i takojnë gjithsecilit prej jush” shtoi Basha.
Kreu i Partisë Demokratike u shpreh se largimi i Ramës mbetet i panegociueshëm dhe se opozita mirëpret ndërhyrjen e ndërkombëtarëve për të zgjidhur krizën politike në vend.
Jenida Vladi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.