Basha takim me bizneset e vogla në Burrel – Taksat e ulëta do të nxisin konsumin dhe prodhimin

Kryetari i Partisë Demokratike, Lulzim Basha zhvilloi të dielën një takim me tregtarë të biznesit të vogël në Burrel. Pasi dëgjoi ankesat, ai u shpjegoi se plani i tij për ulje taksash do të nxisë konsumin dhe do të rrisë prodhimin në vend.

“Ulje të taksave, subvencione për fermerët, sepse këtu kemi më shumë fermerë. Rritje konsumi që sjell rritje të kërkesës në treg, rritje të prodhimit, rritje të kreditimit dhe paratë e shtetit nuk do të hidhen  më për investime koti për palma, do të hidhen për investime që ndihmojnë ekonominë”, u shpreh Basha.

Sa i takon shqetësimeve të biznesit për abuzimet e mundshme nga kontrollorët tatimorë, apo përfaqësues të tjerë të shtetit, Basha shpjegoi projektin e tij që përfshin vendosjen e pullës që tregon shlyerjen e detyrimeve.

“Biznesi i vogël pullën këtu. 1.5% e xhiros, kombinim i të gjitha detyrimeve ndaj shtetit, lokal dhe qendror, maksimumi, tavani. Po të jeni poshtë tavanit, bravo ju qoftë, por sipër 1.5%-shit nuk keni për shkuar dot kurrë me detyrime. Kur të marrin frymë farmacisti, tregtari, kur të marrë frymë biznesi i vogël dhe në veçanti biznesi prodhues, atëherë fillon dhe rigjenerohet ekonomia. Qëllimi nuk do të jenë taksat dhe terrori, qëllimi do të jetë punësimi. Pullën këtu Agim, u gjet tatimor lokal apo qëndror përtej pullës, (tregon prangat me duar) do të thotë është vetëm për korrupsion. Nuk do të ketë më tatimorë rrugëve. Rrugëve duhen konsumatorë, duhen punëtorë, fermerë, tregtarë, sipërmarrës. Tatimorët të gjithë në kazermë”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.