Basha, takim me prodhues shqiptarë – Shpjegon detaje të programit ekonomik të Partisë Demokratike
Kreu i Partisë Demokratike, Lulzim Basha, ka zhvilluar një bisedë me përfaqësues të Bashkimit të Prodhuesve Shqiptarë, të cilëve u shpjegoi detajet e programit ekonomik të partisë që drejton, si dhe efektet që do të ketë zbatimi i këtij programi për biznesin në përgjithësi e për prodhuesit shqiptarë në veçanti.
“Në rrafshin e reformës fiskale, ne i qëndrojmë me vendosmëri angazhimit tonë për taksën e sheshtë 9%. Sikundër, uljen e kontributeve shoqërore në 18%, pra, 9+9 duke zbatuar kështu parimin e taksës së sheshtë si një parim që do të nxisë rritjen ekonomike, do të nxisë punësimin, por po kështu do të nxisë transparencën dhe do të luftojë informalitetit dhe duke çuar në një skenar të tre palët fitojnë. Sipërmarrjet shqiptare në radhë të parë, është një ndihmë e konsiderueshme financiare, është në fakt një akt i cili lë në xhepat dhe në kontot tuaja një pjesë të parave tuaja, se nuk është ndihmë, është thjeshtë mos t’ju fusim dorën në xhep aq thellë saç u është futur në këto 8 vite. Në këtë mënyrë ju keni një stimulues për të stabilizuar gjendjen ekonomike e cila ka qenë e vështirë, është e vështirësuar edhe më shumë këto vitet e fundit. Kemi një stimulues për të investuar dhe për të punësuar, dhe këtu vjen pala e dytë fituese e këtij propozimi që janë të punësuarit,” tha Basha.
Kreu demokrat përsëriti edhe njëherë premtimin për heqjen e taksës mbi karburantit dhe një sërë masash të tjera që do i vijnë në ndihmë qytetarëve dhe biznesit.
“Imagjinoni tani shqiptarin pronar automjeti apo përdorues transporti apo sektorin ekonomik që e kanë karburantin gjakun e ekonomisë, me vështirësitë që përballeni, me të ardhurat që keni me sfidat që duhet të kapërceni, dhe karburantin e paguani aq shtrenjtë sa dy nga vendet me standardin më të lartë në botë – Singapori dhe Suedia, që janë ka 30 vjet që janë ndër vendet me standardin më të lartë të jetesës në botë. Ulja e çmimit të karburantit do të vijë nëpërmjet eliminimit të taksës Rama, 240 lekë të vjetra, 24 lekë të reja për çdo litër, taksë e cila u aplikua, vit pas viti që nga vitit 2014 dhe 2015 dhe që e bëri karburantin shqiptar më të shtrenjtin në Ballkan, në Europë, dhe ndër më të shtrenjtët në botë,” u shpreh Basha.
Përfaqësuesit e prodhuesve shqiptarë shprehen vlerësimet e tyre për programin si dhe shpalosen propozimet e tyre veçanti nevojën për bashkëpunim me qeverinë e ardhshme. Ata kërkuan realizimin e 6 komponentëve që janë dialogu publik privat, harmonizimi i legjislacionit dhe siguria ligjore, lehtësimi procedurial, lehtësirat fiskale, mekanizmat për rritjen e eksporteve dhe inovacioni, komponentë që sipas tyre ndikojnë fort dhe shumë tek industria prodhuese.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.