Basha, takim me tregtarët e mishit në Pogradec: Mbyllja dhe përqendrimi i thertoreve ka sjellë rritjen e çmimit dhe kostove për qytetarët
Pak ditë para protestës së paralajmëruar, kreu i opozitës Lulzim Basha është takuar me tregtarë në Pogradec. Referuar njoftimit zyrtar, gjatë takimit tregtarët e mishit në Pogradec i treguan kreut të PD-së sesi vendimi e qeverisë për mbylljen dhe përqendrimin e thertoreve në pak pika ka rritur çmimin e mishit, duke ndikuar në uljen e fitimit dhe rritjen e kostos për qytetarët.
Tregtarët folën për rënie të punës, mbylljen e bizneseve dhe shprehën kundërshtimin e tyre për vendosjen e tvsh-së për biznesin e vogël.
Po ashtu, gjatë këtij takimi, qytetarët ndanë shqetësimin e papunësisë së lartë, veçanërisht mes të rinjve, për të cilët alternativë e vetme është punësimi sezonal në Greqi. Ndaj, Basha i ftoi të rinjtë të bëhen pjesë e protestës së 27 janarit.
“Mirëse të vini. Kundër padrejtësisë dhe kundër varfërisë e kemi protestën dhe kundër aleancës së qeverisë me krimin. Se ajo është nëna e të gjithë të këqijave” tha Basha.
Në takimin me demokratët e Pogradecit në 27 vjetorin e themelimit të degës së Partisë Demokratike Basha tha se protesta e 27 janarit është një mundësi për qytetarët për të ngritur zërin kundër padrejtësive, për të ndryshuar gjendjen e tyre përmes ndryshimit të qeverisjen e vendit dhe për të hapur një rrugë të re për Shqipërinë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.