Basha takon fermerët e Lushnjes: “Çdo vit, paketë 100 mln euro për bujqësinë. Investime edhe në infrastrukturë”

Kreu i Partisë Demokratike Lulzim Basha është ndalur në Lushnje ku u ka prezantuar  fermerëve dhe  përfaqësuesve të biznesit  në këtë zonë,  lehtësirat që do tu krijohen nga programi i PD për rimëkëmbjen .  Sipas Kreut demokrat,  në program është parashikuar  një paketë 100 mln euro çdo vit për këtë sektor si edhe investime në infrastrukturën rurale .

“Çdo vit, do të kemi 100 milionë euro subvencione drejtpërdrejt tek fermeri dhe 50 milionë euro për infrastrukturën për bujqësinë. Nga pamundësia dhe mbijetesa, fermeri do të kalojë tek mundësia për të krijuar të ardhura mbi 1 milionë lekë, siç është sot fermeri i Kosovës apo Maqedonisë. Fermeri nuk ka pse të jetë skllav si sot, por të jetë shtresë e mesme.”

Sipas Bashës synim mbetet rritja e të ardhurave të fermerit duke bërë të mundur  rritjen e konkurrueshmërisë  në treg të prodhimit vendas, gjë e cila sipas Bashës do të ndikoj në zgjerimin e shtresës së mesme

“Plani ynë fuqizon bujqësinë dhe agrobiznesin me qëllim rritjen e punësimit. Shëron plagën e largimit të rinisë nga Shqipëria. Kjo që propozojmë, është një Shqipëri tjetër, ku nuk përfiton vetëm kryeministri me një grusht oligarkësh, por përfitojnë të gjithë. Që asgjë mos të hidhet në kanal dhe asgjë mos të shkojë kot. Që produkti jo vetëm mos të hidhet, por të konkurrojë denjësisht.

Heqja e taksës “Rama” mbi karburantin 240 lekë për litër do të jetë ndihmë e jashtëzakonshme. Karburanti ynë është më i shtrenjti në rajon, duke bërë çdo mall dhe shërbim më të shtrnejtë dhe jo konkurues. Cilësia e naftës është më e keqja, sepse e dimë të gjithë, se karburanti përzihet.” – u shpreh demokrati Basha.

Kreu  demokrat u ndal edhe te heqja e taksës për karburantin dhe kontrolli i cilësisë së tij  teksa shtoi se për abuzuesit do të ketë ndëshkime.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.