Basha: “Tekstet mësimore shtrenjtohen çdo vit. Jemi i vetmi vend në rajon ku librat për shkollimin e detyrueshëm nuk jepen falas”
Kreu i Partisë Demokratike, Lulzim Basha reagoi sërish në rrjetin social Facebook për tekstet mësimore, ku tha se mijëra prindër dhe nxënës vazhdojnë radhët e gjata për tekstet shkollore anembanë vendit.
Sipas Bashës, jemi vendi i vetëm në rajon ku librat për shkollimin e detyrueshëm jo vetëm nuk jepen falas, por janë shtrenjtuar çdo vit.
“Dy shembuj: Paketa e librave të detyrueshëm për klasën e parë është shtrenjtuar me 33% këto 4 vjet, nga 11 mijë e 790 lekë në vitin shkollor 2012-2013 në 17 mijë e 760 lekë në vitin shkollor 2015-2016. Për të njëjtën periudhë, paketa e librave të detyrueshëm për klasën e gjashtë është rritur me 23 për qind, nga 38 mijë e 70 lekë në 48 mijë e 920 lekë. Kjo rritje çmimesh ka rritur barrën ndaj prindërve e cila rëndon edhe më shumë sepse të ardhurat reale mesatare të familjeve shqiptare kanë rënë prej inflacionit dhe ngrirjes së pagave”, u shpreh Basha.
Kreu i PD më tej në këtë postim thotë se shpërfillja e arsimit është dëm i pariparueshëm për të ardhmen e vendit. “Librat për arsimin e detyrueshëm duhet të jepen falas dhe të shpërndahen nga vetë shkollat. Për këtë, mjafton që qeveria të investojë në libra dhe mjete shkollore paratë që çon për fasada ministrish dhe luks qeveritarësh”, shkruan Basha në FB.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.