Basha, vizitë zyrtare në Kosovë: “Sapo të vijmë në pushtet do të heqim tarifën e Rrugës së Kombit”

Kreu i PD, Lulzim Basha, ndodhet në Kosovë për një vizitë dyditore. Pas takimit me kryeministrin, Avdullah Hoti, kryetari i Partisë Demokratike deklaroi se nëse vjen në pushtet, një ndër vendimet e para që do të marrë do të jetë heqja e tarifës së Rrugës së Kombit.

“Ne vazhdojmë të themi se potencialet janë të mëdha, që në fakt është mënyrë e sjellshme për të thënë që nuk kemi bërë aq sa duhet akoma, por ju siguroj se te PD do të keni një partner të devotshëm, që ato punë që i kemi nisur, si rruga e Kombit dhe liberalizimi ekonomik, në të dy anët e kufirit të vazhdojnë edhe më tej. Një ndër vendimet e para të mia si kryeministër i ri i Shqipërisë do të jetë heqja e traut në Rrugën e Kombit.”

Ndërkohë z.Hoti e ka konsideruar kryeopozitarin si mikun e tij të shtrenjtë:

“Isha i nderuar që bashkë me zëvendëskryeministrat dhe anëtarët e kabinetit të presim kryetarin e opozitës dhe mikun tim shumë të shtrenjtë, z. Lulzim Basha. Ndamë me të shqetësimet tona edhe për menaxhimin e situatës me COVID, edhe për çështjet e rimëkëmbjes ekonomike, dy prioritetet tona kryesore si Qeveri”, 

Pas kryeministrit Hoti, Basha është takuar edhe me kreun e shtetit, Hashim Thaçi. Në një konferencë të përbashkët për mediat, Basha i shprehu mbështetjen presidentit Thaçi, ndërsa vlerëson qëndrimet e tij në mbështetje të dialogut me Serbinë, qëllimi final i së cilës është njohja reciproke.Po ashtu kreu demokrat  tha se ka shprehur mbështetjen e tij dhe të opozitës për të gjitha qëndrimet e krerëve të institucioneve dhe politikës, në veçanti ata që kanë sakrifikuar për këto 22 vite për lirinë e Kosovës.

“Kam theksuar bindjen se bashkërendimi i ngushtë midis SHBA dhe BE ka qenë dhe mbetet një parakusht për suksesin e çdo inciative për stabilizim për të gjithë vendet e rajonit, në veçanti sa i përket dialogut. Shpreha mbështetjen totale timen dhe të PD e opozitës së bashkuar, në veçanti për ata që kanë sakrifikuar për lirinë e Kosovës dhe që u duhet të sakrifikojnë në plan personal për të siguruar vazhdimësinë frytet e pavarësisë dhe të lirisë për të gjithë qytetarët e Kosovës. Në veçanti për presidentin Thaçi dhe të gjithë bashkëpunëtorët e tij”. – u shpreh z.Basha. 

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.